തിരുവനന്തപുരം: 38ാമത് ദേശീയ മാസ്റ്റേഴ്‌സ് അത്‌ലറ്റിക്ക് ചാംപ്യന്‍ഷിപ്പ് മീറ്റ് 2017 ഫെബ്രുവരി 21 മുതല്‍ 25 വരെ തിരുവനന്തപുരത്തു നടക്കുമെന്ന് സംഘാടക സമിതി ജനറല്‍ കണ്‍വീനര്‍ കോശി സാമുവല്‍ വാര്‍ത്താസമ്മേളനത്തില്‍ അറിയിച്ചു. ചന്ദ്രശേഖരന്‍ നായര്‍ സ്റ്റേഡിയം, യൂനിവേഴ്‌സിറ്റി സ്റ്റേഡിയം എന്നിവിടങ്ങളില്‍ നടക്കുന്ന മേളയില്‍ രാജ്യത്തെ 29 സംസ്ഥാനങ്ങളില്‍ നിന്നായി 35 വയസു മുതല്‍ 100 വയസു വരെയുള്ള 5000 കായിക താരങ്ങള്‍ പങ്കെടുക്കും. 23 ഇനങ്ങളിലാണ് മത്സരം. ദേശീയ മാസ്റ്റേഴ്‌സ് അത്‌ലറ്റിക് അസോസിയേഷന്‍ ഓഫ് കേരളയാണ് സംഘാടകര്‍.
ഐ.ജി മനോജ് എബ്രഹാം, മാസ്റ്റേഴ്‌സ് അത്‌ലറ്റിക്ക് അസോസിയേഷന്‍ ഓഫ് കേരള സംസ്ഥാന പ്രസിഡന്റ് കോശി സാമുവല്‍ എന്നിവരടങ്ങുന്ന സമിതിയാണ് മേളയുടെ സംഘാടകര്‍. ദേശീയ മത്സരത്തില്‍ പങ്കെടുക്കാനുള്ള സംസ്ഥാന ടീമിനെ തിരഞ്ഞെടുക്കാനായി അടുത്ത വര്‍ഷം ജനുവരി 13, 14 തിയതികളില്‍ കണ്ണൂരില്‍ അത്‌ലറ്റിക്ക് മീറ്റ് നടക്കും. അസോസിയേഷന്‍ സംസ്ഥാന ജനറല്‍ സെക്രട്ടറി കൃഷ്ണന്‍ കുട്ടിയും വാര്‍ത്താസമ്മേളനത്തില്‍ പങ്കെടുത്തു.