കോഴിക്കോട്: കൃഷിമന്ത്രിയും താനും എല്ലാം തികഞ്ഞവരല്ലെന്നും എല്ലാം അറിയാമെന്ന് കരുതുന്നവര്‍ വിഡ്ഢികളുടെ സ്വര്‍ഗത്തിലാണെന്നും സി.പി.എം നേതാവ് എം.എം മണി എം.എല്‍.എ. കോഴിക്കോട്ട് മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കുകയായിരുന്നു അദ്ദേഹം. വി.എസ് സുനില്‍കുമാര്‍ ഫലപ്രദമായി പ്രവര്‍ത്തിക്കുന്ന മന്ത്രിയാണ്. കൃഷിമന്ത്രിക്കെതിരേ താനെന്തോ പറഞ്ഞതായുള്ള വാര്‍ത്ത എങ്ങിനെയാണ് വന്നതെന്ന് അറിയില്ല. സി.പി.ഐ ഇടുക്കി ജില്ലാ സെക്രട്ടറിയുടെ പ്രസ്താവനയോട് പ്രതികരിക്കാനില്ലെന്നും അദ്ദേഹം കൂട്ടിച്ചേര്‍ത്തു.
വിവരക്കേട് പറയുന്ന റവന്യൂമന്ത്രിയും കര്‍ഷകരുടെ പ്രശ്‌നങ്ങള്‍ക്ക് പരിഹാരം കാണാത്ത കൃഷിമന്ത്രിയും മണ്ടത്തരം കാണിക്കുന്നത് സര്‍ക്കാരിന്റെ പ്രതിഛായയെ ബാധിക്കുമെന്ന തരത്തിലായിരുന്നു മണിയുടെ വിവാദ പരാമര്‍ശം. ഇതിനെതിരേ സി.പി.ഐ രംഗത്തുവന്നിരുന്നു.