കളമശേരി: വര്‍ത്തമാന ജീവിത സാഹചര്യങ്ങളിലെ പ്രശ്‌നപരിഹാരം ആത്മാവിന്റെ വിശുദ്ധിയാണെന്നും മനസിന്റെ മലിനീകരണത്തിന് കാരണമായ എല്ലാ സാഹചര്യങ്ങളെയും തടയേണ്ടത് വിശ്വാസി എന്ന നിലയില്‍ നമ്മുടെ ബാധ്യതയാണെന്നും എസ്.കെ.എസ്.എസ്.എഫ് ജില്ലാ വൈസ് പ്രസിഡന്റ് സൈനുദ്ദീന്‍ വാഫി അഭിപ്രായപ്പെട്ടു.
എസ്.കെ.എസ്.എസ്.എഫ് എച്ച്.എം.ടി ക്ലസ്റ്ററിന്റെ കീഴില്‍ ആരംഭിച്ച മജ്‌ലിസുന്നൂര്‍ മറ്റക്കാട് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ആത്മീയാനുഭൂതിയും മനസിന്റെ വിശുദ്ധിയും സാധ്യമാകുന്നതിന് ബദ്‌രീങ്ങളുടെ പേരിലുള്ള മജ്‌ലിസുന്നൂര്‍ ഏറെ സഹായകരമാണെന്നും പൂര്‍വികരുടെ ആത്മീയപാത പിന്തുടരാന്‍ ഇത്തരം സദസുകളില്‍ പങ്കെടുക്കാന്‍ നാം ജാഗ്രത കാണിക്കണമെന്നും അദ്ദേഹം പറഞ്ഞു. ക്ലസ്റ്റര്‍ പ്രസിഡന്റ് ഐ.എ മുഹമ്മദ് അനസ് അധ്യക്ഷത വഹിച്ചു. കളമശേരി മേഖലാ ജനറല്‍ സെക്രട്ടറി മുഹമ്മദ് സാദിഖ്, എസ്.വൈ.എസ് ഏരിയ ട്രഷറര്‍ അഷ്‌റഫ് മറ്റക്കാട് ക്ലസ്റ്റര്‍ ജനറല്‍ സെക്രട്ടറി എ.എ റാഷിദ് തുടങ്ങിയവര്‍ സംസാരിച്ചു.