കൊല്ലം: കൊല്ലം ഡി.സി.സി പിടിച്ചെടുക്കാന്‍ എ ഗ്രൂപ്പിലെ പ്രമുഖര്‍ രംഗത്തെത്തിയതോടെ അരങ്ങുകൊഴുപ്പിക്കാന്‍ ഡി.സി.സി ജീവനക്കാരന്‍ മദ്യപിക്കുന്ന ചിത്രം എതിര്‍വിഭാഗം ആയുധമാക്കുന്നു. ഡി.സി.സി ഓഫിസിലെ ജീവനക്കാരന്‍ മദ്യപിക്കുന്ന ചിത്രം ഒരു സ്വകാര്യ ചാനലിനു നല്‍കിയാണ് ഡി.സി.സി നേതൃത്വത്തിനെതിരേ ഒരുവിഭാഗം രംഗത്തുവന്നത്. എന്നാല്‍ ചിത്രത്തിന്റെ വിശ്വാസ്യതയിലും സംശയമുയര്‍ന്നിട്ടുണ്ട്.
രണ്ടുമാസം മുന്‍പ് നവീകരണത്തിനായി പൊളിച്ചതാണ് ഡി.സി.സി കെട്ടിടം. മദ്യപിക്കുന്ന ചിത്രം എവിടെയാണെന്നതിന് തെളിവില്ല. ചിത്രം പാര്‍ട്ടിയെ അധിക്ഷേപിക്കാന്‍വേണ്ടിയുള്ളതാണെന്നും ഇതിനെതിരേ നടപടിവേണമെന്നും ആവശ്യം ഉയര്‍ന്നിട്ടിണ്ട്. ഇതിനിടെ ഡി.സി.സി മുന്‍പ്രസിഡന്റും ഉമ്മന്‍ചാണ്ടിയുടെ വിശ്വസ്തനുമായ വി. സത്യശീലന്‍ സ്വകാര്യ ചാനലില്‍ ഡി.സി.സി പ്രസിഡന്റിനെതിരേ ആക്ഷേപവുമായി രംഗത്തുവന്നതു ജില്ലാ കോണ്‍ഗ്രസില്‍ പൊട്ടിത്തെറിക്ക് കാരണമായിട്ടുണ്ട്. പുതിയ ഡി.സി.സി പ്രസിഡന്റുമാരുടെ പട്ടികയില്‍ കൊല്ലത്ത് കൊടിക്കുന്നിലിന്റെ പേരിനാണ് മുന്‍തൂക്കം. ജില്ലയിലെ എ-ഐ ഗ്രൂപ്പുകളിലെ വലിയൊരുവിഭാഗം കൊടിക്കുന്നില്‍ പ്രസിഡന്റാകണമെന്ന ആവശ്യം കെ.പി.സി.സിയെ അറിയിച്ചിട്ടുണ്ട്.