കൊണ്ടോട്ടി: സംസ്ഥാനത്ത് സ്വര്‍ണ വില റെക്കോര്‍ഡിലേക്ക് കുതിക്കുന്നു. പവന് 23,120 രൂപയാണ് ഇന്നലത്തെ വില. കാല്‍ നൂറ്റാണ്ടിനിടെ 10 ഇരട്ടി വര്‍ധനവാണ് സ്വര്‍ണ വിലയില്‍ ഉണ്ടായത്. 1990 മുതലാണ് സ്വര്‍ണ വിലയില്‍ ചാഞ്ചാട്ടം തുടങ്ങിയത്. 2,493 രൂപ മാത്രമായിരുന്നു 1990ല്‍ ഒരു പവനുണ്ടായിരുന്നത്. എന്നാല്‍, 1995ല്‍ ഇത് 3,432 രൂപയായി ഉയര്‍ന്നു. പിന്നീട് സ്വര്‍ണ മാര്‍ക്കറ്റ് ഇടിഞ്ഞു. 1998ല്‍ സ്വര്‍ണ വില പവന് 2,966 ആയി കുറയുകയായിരുന്നു.
2000ത്തിലെത്തിയപ്പോള്‍ ഇത് 3,212 രൂപയായി. 2004ല്‍ ഇത് 4,448 രൂപയായി. 2006ല്‍ 6,255 രൂപയും 2007ല്‍ 6890 രൂപയുമായി ഉയര്‍ന്നു. 2008ല്‍ രണ്ടായിരം രൂപ വര്‍ധിച്ച് 8,892 രൂപയായി. 2009ല്‍ മൂവായിരം രൂപ വര്‍ധിച്ച് 11,077 രൂപയിലുമെത്തി.
2010ല്‍ 12, 280 രൂപയായിരുന്ന സ്വര്‍ണ വില 2011 ആയതോടെ 15,560 രൂപയായി കുത്തനെ കൂടി. 2012ലാണ് സ്വര്‍ണ വിലയില്‍ വന്‍ കുതിച്ചുചാട്ടം ഉണ്ടായത്. സ്വര്‍ണ വില 24,160 രൂപയിലെത്തി. പിന്നീട് 2013ല്‍ ഇത് 22, 240 രൂപയായി. 2014ല്‍ 21, 480 രൂപയായും 2015ല്‍ 19,769 ആയും കുറഞ്ഞെങ്കിലും ഈ വര്‍ഷം മാര്‍ച്ചില്‍ 21,360 രൂപയായി വീണ്ടുമുയര്‍ന്നു.