കോഴിക്കോട്: അറിവിന്റെയും വിനയത്തിന്റെയും ഉദാത്തമായ മാതൃകയാണ് പ്രൊഫ. പി. മുഹമ്മദ് കുട്ടശ്ശേരിയെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍. പ്രൊഫ. പി. മുഹമ്മദ് കുട്ടശ്ശേരി രചിച്ച 'ജീവിതം മധുരസുന്ദരം' ഗ്രന്ഥം പ്രകാശനം ചെയ്യുകയായിരുന്നു അദ്ദേഹം. ബഹുസ്വര സമൂഹത്തില്‍ ജീവിതത്തിന്റെ വിവിധ മേഖലകളിലും എങ്ങനെ വര്‍ത്തിക്കണമെന്ന് പുസ്തകം നമ്മെ പഠിപ്പിക്കുന്നു.
ഒരധ്യാപകന്റെ കര്‍മസാഫല്യം ശിഷ്യരുടെ ജീവിതം സ്വാര്‍ഥകമാക്കുകയാണെങ്കില്‍ പ്രൊഫ. കുട്ടശ്ശേരി ഗ്രന്ഥ രചനയിലൂടെ നൂറായിരം ജന്മങ്ങളുടെ കര്‍മമാണ് ചെയ്തിട്ടുള്ളതെന്നും തങ്ങള്‍ പറഞ്ഞു.
കോഴിക്കോട് അസ്മാ ടവറില്‍ നടന്ന ചടങ്ങില്‍ സി.പി കുഞ്ഞിമുഹമ്മദ് പുസ്തകം ഏറ്റുവാങ്ങി. പി.കെ അഹമ്മദ് അധ്യക്ഷനായി. പി. സുരേന്ദ്രന്‍ മുഖ്യപ്രഭാഷണം നടത്തി. ടി.പി അബ്ദുല്ലക്കോയ മദനി, ഡോ. ഹുസൈന്‍ മടവൂര്‍, നവാസ് പൂനൂര്‍, പി.കെ പാറക്കടവ്, അബ്ദുല്ല മന്‍ഹാം പ്രസംഗിച്ചു. സി.പി സൈതലവി പുസ്തക പരിചയം നടത്തി. പ്രൊഫ. മുഹമ്മദ് ഹസ്സന്‍ സ്വാഗതവും മുജീബ് കൂര്‍മ്മത്ത് നന്ദിയും പറഞ്ഞു. ഫാറൂഖിയ്യ പബ്ലിക്കേഷന്‍ പ്രസിദ്ധീകരിച്ച പുസ്തകം എജ്യുമാര്‍ട്ടാണ് വിതരണം ചെയ്യുന്നത്.