കണ്ണൂര്‍: ദേശീയ പാതയോരത്തെ അനധികൃത കച്ചവടക്കാരേയും അനധികൃതമായി സ്ഥാപിച്ച പരസ്യ ബോര്‍ഡുകളും ഫുട്പാത്തിലെ കച്ചവട സാമഗ്രികളും ഒഴിപ്പിച്ചുതുടങ്ങി. ദേശീയപാത കണ്ണൂര്‍ ഡിവിഷന്റെ കീഴില്‍ വരുന്ന മാഹി മുതല്‍ കാലിക്കടവ് വരെയുള്ള ഭാഗങ്ങളിലാണ് ഒഴിപ്പിക്കല്‍. ആദ്യഘട്ടമായി കുപ്പം മുതല്‍ കണ്ണൂര്‍ വരെയുള്ള ഭാഗത്തെ ഒഴിപ്പിക്കല്‍ കുപ്പത്ത് ഇന്ന് ആരംഭിച്ചു. രണ്ടാം ഘട്ടമായി കാലിക്കടവ് മുതല്‍ കുപ്പം വരെയും പിന്നീട് കണ്ണൂര്‍ മുതല്‍ മാഹി വരെയും ഒഴിപ്പിക്കും. അനധികൃത കച്ചവടക്കാരോട് ഒഴിയണമെന്ന് ആവശ്യപ്പെട്ടുകൊണ്ട് ദേശീയപാത അധികൃതര്‍ നോട്ടീസ് നല്‍കിയിരുന്നു. ഇതനുസരിച്ച് ചിലര്‍ സ്വമേധയാ കടകള്‍ പൊളിച്ചു മാറ്റിയിരുന്നു. അല്ലാത്തവ ജെ.സി.ബി ഉപയോഗിച്ച് നീക്കം ചെയ്യും.