കൊച്ചി: വ്യവസായിയെ തടഞ്ഞുവച്ചു ഭീഷണിപ്പെടുത്തിയ കേസില്‍ സി.പി.എം കളമശേരി മുന്‍ ഏരിയാ സെക്രട്ടറി സക്കീര്‍ ഹുസൈന്‍ നല്‍കിയ മുന്‍കൂര്‍ ജാമ്യാപേക്ഷയില്‍ ഹൈക്കോടതി സര്‍ക്കാരിന്റെ നിലപാടു തേടി. ഹരജി നവംബര്‍ പത്തിന് വീണ്ടും പരിഗണിക്കും.
മുന്‍കൂര്‍ ജാമ്യം തേടി സക്കീര്‍ ഹുസൈന്‍ എറണാകുളം പ്രിന്‍സിപ്പല്‍ സെഷന്‍സ് കോടതിയെ സമീപിച്ചിരുന്നെങ്കിലും കഴിഞ്ഞദിവസം ഹരജി തള്ളിയിരുന്നു. തുടര്‍ന്നാണ് ഹൈക്കോടതിയെ സമീപിച്ചിട്ടുള്ളത്. സക്കീര്‍ ഹുസൈനെതിരേ 16 ക്രിമിനല്‍ കേസുകള്‍ നിലവിലുണ്ടെന്നും ഇവയില്‍ രാഷ്ട്രീയ കേസുകള്‍ കുറവാണെന്നും ചൂണ്ടിക്കാട്ടി സര്‍ക്കാര്‍ സെഷന്‍സ് കോടതിയില്‍ ജാമ്യാപേക്ഷയെ എതിര്‍ത്തിരുന്നു.
എന്നാല്‍ തനിക്കെതിരായ കേസ് പങ്കാളിത്ത ബിസിനസുമായി ബന്ധപ്പെട്ട കേസുകളാണെന്നും ഇതില്‍ ക്രിമിനല്‍ സ്വഭാവമുള്ളതൊന്നും ഇല്ലെന്നും സക്കീര്‍ ഹുസൈന്റെ ഹരജിയില്‍ പറയുന്നു. ഗുണ്ടാ ആക്ട് പ്രകാരം തനിക്കെതിരേ രജിസ്റ്റര്‍ ചെയ്ത കേസ് കെട്ടിച്ചമച്ചതാണെന്നും ഇതിനു പിന്നില്‍ രാഷ്ട്രീയലക്ഷ്യമുണ്ടെന്നും സക്കീര്‍ ഹുസൈന്‍ ആരോപിക്കുന്നു. എറണാകുളം വെണ്ണല സ്വദേശി ജൂബ് പൗലോസ് നല്‍കിയ പരാതിയിലാണ് സക്കീര്‍ ഹുസൈനെതിരേ പൊലിസ് കേസ് രജിസ്റ്റര്‍ ചെയ്തത്. ജൂബ് പൗലോസും മറ്റൊരു വ്യവസായി ഷീല തോമസും തമ്മിലുള്ള ബിസിനസ് തര്‍ക്കം കോടതിയില്‍ നിലനില്‍ക്കെ പ്രശ്‌നത്തില്‍ ഇടപെട്ട് സക്കീര്‍ ഹുസൈന്‍ തന്നെ ഭീഷണിപ്പെടുത്തിയെന്നാണ് പരാതിയില്‍ പറയുന്നത്.
ഇതിനിടെ സംഭവം സി.ബി.ഐ അന്വേഷിക്കണമെന്നാവശ്യപ്പെട്ട് ബി.ജെ.പി മുന്‍ സംസ്ഥാന പ്രസിഡന്റ് വി. മുരളീധരന്‍ ഹൈക്കോടതിയില്‍ ഹരജി നല്‍കിയിട്ടുണ്ട്. വ്യവസായിയെ തട്ടിക്കൊണ്ടുപോയതുമായി ബന്ധപ്പെട്ട് സി.പി.എമ്മിന്റെ മുന്‍ കളമശേരി ഏരിയാ സെക്രട്ടറി സക്കീര്‍ ഹുസൈനെതിരായ കേസും വടക്കാഞ്ചേരിയിലെ നഗരസഭാ കൗണ്‍സിലര്‍ ജയന്തന്‍ യുവതിയെ പീഡിപ്പിച്ച കേസും സി.ബി.ഐ അന്വേഷിക്കണമെന്നാവശ്യപ്പെട്ടാണ് മുരളീധരന്‍ ഹൈക്കോടതിയില്‍ ഹരജി നല്‍കിയിരിക്കുന്നത്.