വാഷിങ്ടണ്‍: ട്രംപിന്റെ അനുയായിക്കെതിരേ കൂവിയ പാര്‍ട്ടി പ്രവര്‍ത്തകരെ ഒബാമ തടഞ്ഞു. നോര്‍ത്ത് കരോലിനയില്‍ ഹിലരിയുടെ റാലിയില്‍ തന്റെ അനുയായികള്‍ ഡൊണാള്‍ഡ് ട്രംപിന്റെ അനുകൂലിക്കെതിരേ കൂവിയതാണ് ഒബാമ ഇടപെട്ട് തടഞ്ഞത്. റാലിയില്‍ ട്രംപിന്റെ ചിഹ്നം ഉയര്‍ത്തി ഉറക്കെ ശബ്ദമുണ്ടാക്കിയപ്പോഴായിരുന്നു അയാളെ നിശബ്ദനാക്കാനായി ഹിലരി അനുയായികള്‍ കൂവിയത്.
സൈനിക യൂനിഫോമും തൊപ്പിയും ധരിച്ചെത്തിയ ട്രംപ് അനുകൂലി ഇരിപ്പിടത്തിനു മുകളില്‍ കയറി നിന്ന് ശബ്ദമുണ്ടാക്കി. തുടര്‍ന്ന് ഹിലരി അനുകൂലികള്‍ ഇയാളെ കൂവിയിരുത്താന്‍ ശ്രമിച്ചു. അതിരുകടന്നപ്പോള്‍ ഒബാമ കയറി ഇടപെട്ടു.'ഹോള്‍ഡ് അപ്പ്'എന്ന് തുടര്‍ച്ചയായി അണികളോട് ഒബാമ പറയുന്ന ദൃശ്യങ്ങള്‍ പുറത്തുവന്നു.
അഭിപ്രായസ്വാതന്ത്ര്യത്തെ ബഹുമാനിക്കുന്ന രാജ്യത്താണ് നാം ജീവിക്കുന്നതെന്നും സൈനിക വേഷത്തെയും ബഹുമാനിക്കണമെന്നും ഒബാമ ഓര്‍മിപ്പിച്ചു. എന്നാല്‍ ഒബാമയുടെ നടപടിയെ ഡൊണാള്‍ഡ് ട്രംപ് വിമര്‍ശിച്ചു.
പെന്‍സില്‍ വാനിയയിലെ റാലിയില്‍ ഒബാമയുടെ പ്രവൃത്തി കളങ്കമാണെന്നും ഒബാമ ബുദ്ധിഭ്രമം സംഭവിച്ചപോലെ പെരുമാറിയെന്നും ട്രംപ് കുറ്റപ്പെടുത്തി.