മാഡ്രിഡ്: സ്പാനിഷ് ലാ ലിഗയില്‍ ബാഴ്‌സലോണയ്ക്ക് ജയം. ഒന്നിനെതിരേ രണ്ടു ഗോളുകള്‍ക്ക് കറ്റാലന്‍ ടീം സെവിയ്യയെ കീഴടക്കി. ഒരു ഗോളിനു മുന്നില്‍ നിന്ന ശേഷം സ്വന്തം തട്ടകത്തില്‍ രണ്ടു ഗോള്‍ വഴങ്ങിയാണ് സെവിയ്യക്ക് തോല്‍വി പിണഞ്ഞത്. ബാഴ്‌സയ്ക്കായി മെസ്സിയും സുവാരസും വല ചലിപ്പിച്ചു. കളിയുടെ 15ാം മിനുട്ടില്‍ വിറ്റോളോയാണ് സെവിയ്യയെ മുന്നിലെത്തിച്ചത്. ആദ്യ പകുതിക്ക് തൊട്ടുമുന്‍പ് 43ാം മിനുട്ടില്‍ മെസ്സി ബാഴ്‌സയെ ഒപ്പമെത്തിച്ചു. 61ാം മിനുട്ടില്‍ സുവാരസിലൂടെ ബാഴ്‌സലോണ വിജയമുറപ്പിച്ചു. ജയത്തോടെ ബാഴ്‌സലോണ രണ്ടാം സ്ഥാനത്ത്. 25 പോയിന്റുകളാണ് ബാഴ്‌സയ്ക്കുള്ളത്. 27 പോയിന്റുമായി റയല്‍ മാഡ്രിഡ് ഒന്നാം സ്ഥാനത്ത്.
മറ്റൊരു മത്സരത്തില്‍ വിയ്യാറല്‍ 2-0ത്തിനു റയല്‍ ബെറ്റിസിനെ വീഴ്ത്തി. ജയത്തോടെ വിയ്യാറല്‍ മൂന്നാം സ്ഥാനത്ത്.

ലെയ്സ്റ്ററിനു തോല്‍വി
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ നിലവിലെ ചാംപ്യന്മാരായ ലെയ്സ്റ്റര്‍ സിറ്റിയെ വെസ്റ്റ് ബ്രോംവിച് ആല്‍ബിയോണ്‍ അട്ടിമറിച്ചു. ഒന്നിനെതിരേ രണ്ടു ഗോളുകള്‍ക്കാണ് വെസ്റ്റ് ബ്രോമിന്റെ വിജയം.

റോമയ്ക്കും ഇന്ററിനും വിജയം
മിലാന്‍: ഇറ്റാലിയന്‍ സീരി എയില്‍ റോമ, ഇന്റര്‍ മിലാന്‍ ടീമുകള്‍ക്ക് വിജയം. റോമ 3-0ത്തിനു ബോലോഗ്നയെ വീഴ്ത്തി. ഇന്റര്‍ മിലാന്‍ 3-0ത്തിനു ക്രോട്ടോണിനെ പരാജയപ്പെടുത്തി. നാപോളി- ലാസിയോ പോരാട്ടം 1-1നു സമനില.

പി.എസ്.ജിക്ക് ജയം
പാരിസ്: ഫ്രഞ്ച് ലീഗ് വണില്‍ നിലവിലെ ചാംപ്യന്‍മാരായ പാരിസ് സെന്റ് ജെര്‍മെയ്ന്‍ മറുപടിയില്ലാത്ത നാലു ഗോളുകള്‍ക്ക് റെന്നെസിനെ പരാജയപ്പെടുത്തി. കവാനി, റാബിയോട്, വെറാറ്റി എന്നിവര്‍ വല ചലിപ്പിച്ചപ്പോള്‍ ഒരു ഗോള്‍ സെല്‍ഫിലൂടെ ലഭിച്ചു. 26 പോയിന്റുകളുമായി പി.എസ്.ജി മൂന്നാം സ്ഥാനത്ത്.