പാരിസ്: കരിയറിലെ ആദ്യ ഒന്നാം റാങ്ക് കിരീട നേട്ടത്തിലൂടെ ആഘോഷിച്ച് ബ്രിട്ടന്റെ ആന്‍ഡി മുറെ. പാരിസ് മാസ്റ്റേഴ്‌സ് ടൂര്‍ണമെന്റില്‍ കിരീടം നേടിയാണ് മുറെ ഒന്നാം റാങ്ക് അരക്കിട്ടുറപ്പിച്ചത്. ഫൈനലില്‍ അമേരിക്കന്‍ താരം ജോണ്‍ ഇസ്‌നറെ വീഴ്ത്തിയാണ് മുറെയുടെ നേട്ടം. മൂന്നു സെറ്റ് നീണ്ട പോരില്‍ 6-3, 6-7 (4-7), 6-4 എന്ന സ്‌കോറിനാണ് മുറെ വിജയിച്ചത്. പാരിസ് ഫൈനലിലെ വിജയത്തോടെ വിവിധ ടൂര്‍ണമെന്റുകളിലായി ബ്രിട്ടീഷ് താരം സ്വന്തമാക്കിയ തുടര്‍ച്ചയായ 19ാം വിജയമായിരുന്നു ഫൈനലിലേത്.
സെര്‍ബിയയുടെ നൊവാക് ദ്യോക്കോവിചില്‍ നിന്നാണ് മുറെ ഒന്നാം സ്ഥാനം സ്വന്തമാക്കിയത്. ദ്യോക്കോവിച് പാരിസ് മാസ്റ്റേഴ്‌സിന്റെ ക്വാര്‍ട്ടറില്‍ തോറ്റു പുറത്തായതോടെ ഫൈനലിലെത്തിയാല്‍ തന്നെ ഒന്നാം റാങ്ക് നേടാമെന്ന നിലയിലാണ് മുറെ നിന്നത്.
സീസണിലെ അവസാന പോരാട്ടമായ എ.ടി.പി വേള്‍ഡ് ടൂര്‍ ഫൈനല്‍സില്‍ ജോണ്‍ മെക്കന്റോ ഗ്രൂപ്പിലാണ് മുറെ. ഈ മാസം 14നു നടക്കുന്ന ആദ്യ മത്സരത്തില്‍ മുറെ മരിന്‍ സിലിച്ചുമായി ഏറ്റുമുട്ടും. കെയ് നിഷികോരി, സ്റ്റാനിസ്ലാസ് വാവ്‌റിങ്ക എന്നിവരാണ് മറ്റു എതിരാളികള്‍.
ഇവാന്‍ ലെന്‍ഡല്‍ ഗ്രൂപ്പില്‍ നൊവാക് ദ്യോക്കോവിച്, മിലോസ് റാവോനിക്ക്, ഗേല്‍ മോന്‍ഫില്‍സ്, ഡൊമിനിക്ക് തീം എന്നിവരാണ് മത്സരിക്കുന്നത്.