മൂവാറ്റുപുഴ: 2016-17 അദ്ധ്യയനവര്‍ഷത്തെ റവന്യൂജില്ലാ സ്‌കൂള്‍ ശാസ്‌ത്രോത്സവത്തിന് ഇന്ന് മൂവാറ്റുപുഴയില്‍ തുടക്കമാകും.ശാസ്‌ത്രോത്സവത്തിന്റെ ഭാഗമായുള്ള ശാസ്ത്രമേള, മൂവാറ്റുപുഴ നിര്‍മ്മല ഇ.എം.എച്ച്.എസ്.എസ്.ലും ഗണിതശാസ്ത്രമേള എസ്.എന്‍.ഡി.പി. സ്‌കൂളിലും, സാമൂഹ്യശാസ്ത്രമേള, ഐ.ടി മേള എന്നിവ സെന്റ് അഗസ്റ്റ്യന്‍സ് എച്ച്.എസ്.എസ്.ലും, പ്രവര്‍ത്തി പരിചയമേള തര്‍ബിയത്ത് സ്‌കൂളിലും, മേഖലാ വൊക്കേഷണല്‍ എക്‌സ്‌പോ ഗവ. മോഡല്‍ സ്‌കൂളിലും നടക്കും. മത്സര ഇനങ്ങളുടെ രജിസ്‌ട്രേഷന്‍ ഇന്ന് രാവിലെ 10 മുതല്‍ ഒന്നുവരെ സെന്റ് അഗസ്റ്റ്യന്‍സ് സ്‌കൂളില്‍ നടക്കും.
മേളയില്‍ എല്‍.പി., യു.പി. ഹൈസ്‌കൂള്‍, ഹയര്‍ സെക്കന്ററി, വി.എച്ച്.എസ്.ഇ. വിഭാഗങ്ങളിലെ നാലായിരത്തോളം കുട്ടികള്‍ വിവിധ മത്സരങ്ങളില്‍ പങ്കാളികളാകും. വൊക്കേഷണല്‍ എക്‌സ്‌പോയില്‍ എറണാകുളം, കോട്ടയം ജില്ലകളില്‍ നിന്നുള്ള 65 സ്‌കൂളിലെ കുട്ടികള്‍ പങ്കെടുക്കും. പ്രദര്‍ശനം കാണുവാന്‍ പൊതുജനങ്ങള്‍ക്ക് അവസരമൊരുക്കിയിട്ടുണ്ട്. നാളെ രാവിലെ ഒന്‍പതിന് വിദ്യാഭ്യാസ ഉപഡയറക്ടര്‍ ലൗലി സൈമണ്‍ പതാക ഉയര്‍ത്തും. 10ന് സെന്റ് അഗസ്റ്റ്യന്‍സ് സ്‌കൂളില്‍ നടക്കുന്ന ഉദ്ഘാടന സമ്മേളനത്തില്‍ ബ്ലോക്ക് പഞ്ചായത്ത് പ്രസിഡന്റ് മേരി ബേബി അദ്ധ്യക്ഷത വഹിക്കും.