കോട്ടയം:കാരിത്താസ് ആശുപത്രിക്ക് മറ്റൊരു പൊന്‍തൂവല്‍കൂടി. കരള്‍ രോഗികള്‍ക്ക് ഏറെ ആശ്വാസമാകുന്ന 'ടിപ്‌സ്' കേരളത്തിലാദ്യമായി വിജയകരമായി നടപ്പിലാക്കി കാരിത്താസ് ആശുപത്രി.
ദീര്‍ഘകാലമായി ഗുരുതരമായ കരള്‍ രോഗം ബാധിച്ച കളത്തൂക്കടവ് സ്വദ്ദേശി മണിലാല്‍ പി.എച്ച്, പെരുവന്താനം സ്വദേശി ഹരി എന്‍ എന്നിവരാണ് ടിപ്‌സിന് വിധേയരായത്. ശസ്ത്രക്രിയ ഇല്ലാതെ തന്നെ കത്തീറ്ററിന്റെ സഹായത്തോടുകൂടി കഴുത്തിലൂടെ കരളിലെത്തി രോഗബാധിതമായ കരളിനുള്ളിലെ രണ്ടു പ്രധാന രക്ത ധമനികള്‍ തമ്മില്‍ ബന്ധിപ്പിക്കുന്ന അതിസങ്കീര്‍ണ്ണമായ ചികില്‍സാ രീതിയാണ് ടിപ്‌സ്.
ഗുരുതരമായി ലിവര്‍ സിറോസിസ് ബാധിച്ച രോഗികളില്‍ കരളിനുള്ളിലെ രക്തസമ്മര്‍ദ്ദം കൂടുകയും (പോര്‍ട്ടല്‍ ഹൈപ്പര്‍ ടെന്‍ഷന്‍) തുടര്‍ന്ന് വയറിനുള്ളില്‍ വെള്ളം കെട്ടുകയും അന്നനാളത്തിലൂടെ രക്തസ്രാവം ഉണ്ടാവുകയും ചെയ്യുന്നു.
ഇങ്ങനെയുള്ള രോഗികളിലും കരള്‍മാറ്റിവയ്ക്കല്‍ ശസ്ത്രക്രിയയ്ക്ക് കാത്തിരിക്കുന്ന രോഗികളിലും ടിപ്‌സ് ചെയ്യാന്‍ കഴിയും.
കാരിത്താസിലെ എച്ച്പിബി- ഗാസ്‌ട്രോ ഇന്റര്‍വെന്‍ഷണല്‍ റേഡിയോളജിസ്റ്റ് ആയ ഡോ. സോംശരണ്‍ ബെഡ്‌ഗെരി, ഡോ. രാജേഷ് പിള്ള, ഗാസ്‌ട്രോ സര്‍ജന്‍മാരായ ഡോ. മുരളി എ, ഡോ. മഞ്ചുരാജ് കെ.പി ഗാസ്‌ട്രോ എന്‍ട്രോളജിസ്റ്റുമാരായ ഡോ. ടോം കുര്യന്‍, ഡോ. ജിനോ തോമസ് അനസ്തറ്റിസ്റ്റ് ഡോ. ബുള്‍ബുള്‍ സൂസന്‍ ജേക്കബ് എന്നിവരുടെ സഹായത്തോടെയാണ് ടിപ്‌സ് നടപ്പിലാക്കിയത്.