വാടാനപ്പള്ളി: വീട്ടമ്മയെ കൊലപ്പെടുത്തിയ കേസില്‍ ബന്ധുവായ യുവാവ് അറസ്റ്റില്‍. വീട്ടമ്മയെ കൊലപ്പെടുത്തുകയും ഭര്‍ത്താവിനെയും സുഹൃത്തിനെയും വെട്ടിപ്പരുക്കേല്‍പിക്കുകയും ചെയ്ത കേസില്‍ ബന്ധുവായ യുവാവിനെ അറസ്റ്റ് ചെയ്തു.
വലപ്പാട് മുറിയാംതോട് പടിഞ്ഞാറ് തുപ്രയാടന്‍ രാജിത്ത്(30)ആണ് അറസ്റ്റിലായത്. തുപ്രയാടന്‍ ശശിയുടെ ഭാര്യ ചന്ദ്രിക(50)യാണ് കൊല്ലപ്പെട്ടത്. ശശി (53), സുഹൃത്ത് വലപ്പാട് ബീച്ച് അഞ്ചങ്ങാടി ഊണുങ്ങല്‍ ബിജു (33)എന്നിവര്‍ക്കാണ് പരുക്കേറ്റത്. കഴിഞ്ഞ ഒക്ടോബര്‍ 24ന് രാത്രിയാണ് കേസിനാസ്പദമായ സംഭവം.
ലഹരിക്ക് അടിമയായ രാജിത്ത് ബന്ധുവും അയല്‍ വാസിയുമായ ശശിയുടെ വീട്ടിലെത്തി മൂന്നു പേരെയും വെട്ടിപ്പരുക്കേല്‍പിക്കുകയായിരുന്നു.
തൃശൂര്‍ അശ്വിനി ആശുപത്രിയില്‍ ചികിത്സയിലിരിക്കെ 27ന് ചന്ദ്രിക മരിച്ചു. രാജിത്തിനെ വലപ്പാട് പൊലിസ് പിടികൂടിയെങ്കിലും ഇയാള്‍ മാനസിക വിഭ്രാന്തി കാണിച്ചതിനെ തുടര്‍ന്ന് പൊലിസ് നിരീക്ഷണത്തില്‍ മാനസിക രോഗാശുപത്രിയില്‍ ചികിത്സയിലായിരുന്നു.
എന്നാല്‍ മയക്കുമരുന്നിന് അടിമയാണിയാളെന്ന് ചികിത്സക്കിടെ അറിവായി. തുടര്‍ന്ന് ആശുപത്രിയില്‍ നിന്ന് ഡിസ്ചാര്‍ജ് വാങ്ങിയാണ് അറസ്റ്റ് രേഖപ്പെടുത്തിയത്.
വലപ്പാട് സി.ഐ സി.ആര്‍ സന്തോഷ്, എസ്.ഐ മഹേഷ് കണ്ടമ്പത്ത്, സീനിയര്‍ സി.പി.ഒമാരായ റഫീഖ്, ജലീല്‍, സി.പി.ഒ മണികണ്ഠന്‍ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്.