വില്‍പനക്ക് പിടിക്കാറായതും 38 ദിവസം വളര്‍ച്ചയെത്തിയതുമായ കോഴികളെയാണ് തെരുവ് നായ്ക്കള്‍ ആക്രമിച്ചത്
മാള: തെരുവ് നായ്ക്കളുടെ ആക്രമണത്തില്‍ കോഴിഫാമിലെ അറുന്നൂറോളം ഇറച്ചിക്കോഴികള്‍ ചത്തു. മാള ഗ്രാമപഞ്ചായത്തിലെ കാവനാട് പ്രദേശത്ത് മാണിയംപറമ്പില്‍ മുരുകേശന്റെ കോഴിഫാമില്‍ ഇന്നലെ പുലര്‍ച്ചെയാണ് തെരുവ് നായ്ക്കളുടെ ആക്രമണമുണ്ടായത്. എട്ടോളം തെരുവ് നായ്ക്കള്‍ കൂട്ടമായെത്തി കോഴി ഷെഡിന്റെ നെറ്റ് തകര്‍ത്താണ് അകത്ത് കടന്നത്. മൂന്ന് ഷെഡുകളിലായി നാലായിരത്തോളം കോഴികളെയാണിവിടെ വളര്‍ത്തിയിരുന്നത്.
ഇതില്‍ ഒരു ഷെഡില്‍ കയറിയാണ് തെരുവ് നായ്ക്കള്‍ അറുന്നൂറോളം കോഴികളെ കടിച്ചു കൊന്നതും കുറേയെണ്ണത്തിനെ മൃതപ്രായമാക്കിയതും.ഒരു ലക്ഷത്തോളം രൂപയുടെ നഷ്ടമുണ്ടായതായാണ് കണക്ക്. വില്‍പനക്ക് പിടിക്കാറായതും 38 ദിവസം വളര്‍ച്ചയെത്തിയതുമായ കോഴികളെയാണ് തെരുവ് നായ്ക്കള്‍ ആക്രമിച്ചത്. പുലര്‍ച്ചെ നായ്ക്കളുടെ ശബ്ദം കേട്ടെത്തിയ വീട്ടുകാര്‍ ശബ്ദമുണ്ടാക്കിയതിനെ തുടര്‍ന്ന് തെരുവ് നായ്ക്കള്‍ ഓടിമാറിയതിനാല്‍ കൂടുതല്‍ നാശനഷ്ടങ്ങള്‍ ഒഴിവായി.വീട്ടില്‍ നിന്നും അറുപത് മീറ്ററോളം അകലത്തിലാണ് മൂന്ന് കോഴി ഷെഡുകളും സ്ഥിതിചെയ്യുന്നത്. പ്രദേശത്ത് തെരുവ് നായ്ക്കളുടെ ശല്യം രൂക്ഷമാണ്.പകലും രാത്രിയും വലിയ തോതിലുള്ള ശല്യമാണ് ജനങ്ങള്‍ക്കുണ്ടാവുന്നത്. രൂക്ഷമായ തെരുവ് നായ ശല്യത്തിന് പരിഹാരം കാണാന്‍ അധികൃതരുടെ ഭാഗത്ത് നിന്ന് യാതൊരു നടപടിയും ഉണ്ടാകാത്തതില്‍ ജനങ്ങള്‍ക്കിടയില്‍ പ്രതിഷേധം ശക്തമാകുകയാണ്.