റിയാദ്: യമനിലേക്കുള്ള ജീവ കാരുണ്യ പ്രവര്‍ത്തനങ്ങളുമായി ബന്ധപ്പെട്ടത് വന്ന നിരവധി കപ്പലുകള്‍ ഹൂതികള്‍ പിടിച്ചെടുത്തു തടഞ്ഞു വെച്ചതായും അത് മൂലം ടണ്‍ കണക്കിന് അവശ്യ ഭക്ഷ്യ വസ്തുക്കളടക്കം നിരവധി അവശ്യവസ്തുക്കള്‍ നശിച്ചതായും അറബ് സഖ്യ സേന വ്യക്തമാക്കി.

മൂന്നു മാസത്തിനിടക്ക് അവശ്യ വസ്തുക്കളുമായെത്തിയ 34 കപ്പലുകളാണ് ഹൂതികള്‍ പിടിച്ചെടുത്തതെന്നു സഖ്യ സേന വക്താവ് മേജര്‍ ജനറല്‍ അഹ്മദ് അസീരി പറഞ്ഞു. വിവിധ രാജ്യങ്ങളില്‍ നിന്നെത്തിയ കപ്പലുകളാണ് തുറമുഖത്തു വെച്ച് പിടികൂടി വസ്തുക്കള്‍ നശിപ്പിച്ചത്. ഹൂതികളുടെ അധീനതയിലുള്ള ഏറ്റവും വലിയ തുറമുഖമായ ഹുദൈദ തുറമുഖത്തു നിലവില്‍ മനുഷ്യാവകാശ പ്രവര്‍ത്തകര്‍ക്ക് പ്രവേശനമില്ല. അതിനാല്‍ ഇവിടേക്ക് വരുന്ന മരുന്നുകളും അവശ്യ വസ്തുക്കളും പരിശോധിക്കുവാനോ അത് വിതരണം ചെയ്യാനോ സാധിക്കാതെ നില്‍ക്കുകയാണ്.

496000 ടണ്‍ ഭക്ഷ്യ വസ്തുക്കള്‍, 146000 ടണ്‍ എണ്ണ ഉല്‍പന്നങ്ങള്‍, 275000 ടണ്‍ സിമന്റ്, സ്റ്റീല്‍ ഉല്‍പന്നങ്ങളുമാണ് തടയപ്പെട്ടത്. ഹുദൈദ തുറമുഖത്തില്‍ പുറത്തേക്ക് ഇറക്കാനാകാതെ ഏഴു മാസമായി ജീവ കാരുണ്യ പ്രവര്‍ത്തന വസ്തുക്കള്‍ പിടിച്ചു വെച്ചിരിക്കുകയാണെന്നും അസീരി ആരോപിച്ചു. യമന്‍ തുറമുഖങ്ങളില്‍ ജീവ കാരുണ്യ പ്രവര്‍ത്തനങ്ങളുമായി എത്തിയ അവശ്യ വസ്തുക്കള്‍ മനുഷ്യാവകാശ പ്രവര്‍ത്തകര്‍ക്ക് പ്രവേശനമില്ലാത്തതിനാല്‍ വേണ്ട രീതിയില്‍ ജീവകാരുണ്യ പ്രവര്‍ത്തങ്ങള്‍ നടത്തുവാന്‍ സാധിക്കുന്നില്ലെന്ന് യു എന്‍ ജീവ കാരുണ്യ പ്രവര്‍ത്തന തലവന്‍ സ്റ്റീഫന്‍ ഒ ബ്രിന്‍ നേരത്തെ തന്നെ വ്യക്തമാക്കിയിരുന്നു.