സ്വന്തം ലേഖിക

കോഴിക്കോട്: പൊലിസിന്റെ കണ്ണുവെട്ടിച്ച് അമിതവേഗതയില്‍ കുതിച്ചുപായുന്ന വാഹനങ്ങള്‍ക്ക് പൂട്ടിട്ട് പൊലിസിന്റെ ഇന്റര്‍സെപ്റ്റര്‍ ഇന്നോവ കാര്‍ നഗരത്തില്‍ കറങ്ങുന്നു. ഒരാഴ്ച മുന്‍പാണ് ഇന്റര്‍സെപ്റ്റര്‍ കാര്‍ വാഹന പരിശോധനയ്ക്കായി നിരത്തിലിറങ്ങിയത്. ദിവസേന 25,000 രൂപയോളം പിഴയിനത്തില്‍ വാഹനംവഴി ഈടാക്കുന്നുണ്ട്. പരിശോധനയ്ക്കിടെ വാഹനത്തിന് അനുവദിച്ച വേഗമെത്രയാണെന്നും എത്ര വേഗത്തിലാണ് വാഹനം ഓടിക്കൊണ്ടിരുന്നതെന്നുമെല്ലാം വ്യക്തമാക്കുന്ന കളര്‍ പ്രിന്റര്‍ ലഭിക്കുന്നതിനാല്‍ പൊലിസുകാരുടെ കണ്ണുവെട്ടിച്ച് രക്ഷപ്പെടുക അസാധ്യമാണ്.
ജില്ലയുടെ വിവിധ ഭാഗങ്ങളിലാണ് ഓരോ ദിവസവും കാര്‍ സഞ്ചരിക്കുന്നത്. ഒരു എസ്.ഐയും നാലു സിവില്‍പൊലിസ് ഓഫിസര്‍മാരുമാണ് വാഹനത്തിലുള്ളത്. നാലുകിലോമീറ്റര്‍ അകലെയുള്ള വാഹനങ്ങള്‍ വരെ റഡാറില്‍ കുടുങ്ങുമെന്നതാണ് ഇന്റര്‍സെപ്റ്ററിന്റെ സവിശേഷത. പിന്‍ഭാഗത്ത് ഒരു ഓഫിസിനാവശ്യമായ സംവിധാനവും ഈ പൊലിസ് വാഹനത്തിലുള്ളത് കൂടുതല്‍ സൗകര്യപ്രദമാണ്. നിയമം ലംഘിച്ച് ഓടുന്ന വാഹനത്തെ കസ്റ്റഡിയിലെടുക്കാന്‍ തൊട്ടടുത്ത ട്രാഫിക് യൂനിറ്റിലേക്ക് സന്ദേശം നല്‍കാനുള്ള സംവിധാനം, ഓട്ടത്തിന്റെ ദൃശ്യങ്ങള്‍ കൃത്യമായി ഒപ്പിയെടുക്കുന്ന കാമറ, ഫോട്ടോസ്റ്റാറ്റ്, പ്രിന്റര്‍, സ്‌കാനര്‍ തുടങ്ങിയവയെല്ലാം ഈ വാഹനത്തിലുണ്ട്. കൂടാതെ തീപിടിച്ചാല്‍ അണയ്ക്കാനുള്ള സജ്ജീകരണവും ഈ വാഹനത്തിലുണ്ട്.
സീറ്റ് ബെല്‍റ്റ് ധരിക്കാത്തത് മുതല്‍ മൊബൈല്‍ ഫോണ്‍ ഉപയോഗം വരെയുള്ള കാര്യങ്ങളെല്ലാം കൃത്യമായി പൊലിസിന്റെ കാമറയില്‍ പതിയുമെന്നതിനാല്‍ എന്തെങ്കിലും പറഞ്ഞ് ഇനി ഡ്രൈവര്‍മാര്‍ക്ക് രക്ഷപ്പെടാന്‍ സാധ്യക്കില്ലെന്ന് ട്രാഫിക് പൊലിസുകാര്‍ പറയുന്നു. ഒരാഴ്ചക്കകം അഞ്ഞൂറോളം പേര്‍ക്കാണ് ഇതുവഴി പിഴ ചുമത്തിയത്. അമിതവേഗത ഒരു പരിധിവരെ തടയാന്‍ ഇന്റര്‍സെപ്റ്റര്‍ ഇന്നോവ കാറുകൊണ്ട് സാധിക്കുമെന്ന് അധികൃതര്‍ പറയുന്നു. ഒരു വാഹനം മാത്രമാണ് ജില്ലയിലേക്ക് ഇപ്പോള്‍ അനുവദിച്ചിരിക്കുന്നത്. അധികം വൈകാതെ കൂടുതല്‍ വാഹനങ്ങള്‍ അനുവദിക്കുമെന്നും തുടര്‍ന്ന് അമിതവേഗതയിലുള്ള ഡ്രൈവിങ് ജില്ലയില്‍ നിന്ന് പൂര്‍ണമായും തുടച്ചുനീക്കാനാകുമെന്നുമുള്ള പ്രതീക്ഷയിലാണ് അധികൃതര്‍.