തലശ്ശേരി: 180 പാക്കറ്റ് ബ്രൗണ്‍ഷുഗറുമായി തലശ്ശേരിയില്‍ അഞ്ചുപേര്‍ പിടിയിലായി. സംഘം സഞ്ചരിച്ച കാറും ഓട്ടോറിക്ഷയും തലശ്ശേരി സി.ഐ പ്രദീപന്‍ കണ്ണിപ്പൊയിലിന്റെ നേതൃത്വത്തിലുള്ള പൊലിസ് കസ്റ്റഡിയിലെടുത്തു. തലശ്ശേരി മട്ടാമ്പ്രം സ്വദേശികളായ മാലിയാട്ട് വീട്ടില്‍ അറാഫത്ത്(33), കുമ്പളപുറത്ത് യൂനുസ്(34), കുമ്പളപുറത്ത് സിയാദ്(34), മുഴപ്പിലങ്ങാട് റിഫ മന്‍സിലില്‍ റഫീഖ്(32), തൈക്കണ്ടി വീട്ടില്‍ മജീദ്(42) എന്നിവരെയാണ് ഇന്നലെ രാവിലെ അറസ്റ്റ് ചെയ്തത്. വടകര നര്‍കോട്ടിക് കോടതി പ്രതികളെ റിമാന്‍ഡ് ചെയ്തു. പ്രതികളുടെ വീടുകളിലും പൊലിസ് റെയ്ഡ് നടത്തി. നേരത്തെ ലഹരി വസ്തുക്കള്‍ വില്‍പന നടത്തിയതിന്റെ പേരില്‍ കേസുകളിലുള്‍പ്പെട്ടവരും ശിക്ഷ നേരിട്ടവരുമാണ് പിടിയിലായവരില്‍ ചിലര്‍. തലശ്ശേരി കടല്‍പ്പാലം, മത്സ്യമാര്‍ക്കറ്റ് കേന്ദ്രീകരിച്ച് പ്രവര്‍ത്തിച്ചു വരുന്ന മയക്കുമരുന്ന് വില്‍പന സംഘത്തിലെ കണ്ണികളാണ് പിടിയിലായവര്‍. തലശ്ശേരി ചാലില്‍ ഇന്ദിരാ പാര്‍ക്കിനു സമീപം വാഹനത്തിലെത്തി മയക്കുമരുന്ന് കൈമാറാന്‍ നോക്കുന്നതിനിടയിലാണ് സംഘം പൊലിസിന്റെ വലയിലായത്. കഴിഞ്ഞ മൂന്നാഴ്ചയ്ക്കുള്ളില്‍ 380 പാക്കറ്റ് ബ്രൗണ്‍ഷുഗറാണ് തലശ്ശേരി പൊലിസ് പിടിച്ചെടുത്തത്.