കുമ്പള: ടൗണിലും പരിസരങ്ങളിലും പൊലിസ് നടത്തിയ മിന്നല്‍ പരിശോധനയില്‍ 25ഓളം ബൈക്കുകള്‍ പിടിയിലായി. ഇന്നലെ ഉച്ചയ്ക്ക് 12ഓടെ എസ്.ഐമാരായ ബാബു തോമസ്, കൃഷ്ണ നായിക്ക് എന്നിവരുടെ നേതൃത്വത്തില്‍ നടത്തിയ പരിശോധനയിലാണ് ബൈക്കുകള്‍ പിടിച്ചെടുത്തത്. ടൗണില്‍ സ്‌കൂള്‍ കോളജ് വിദ്യാര്‍ഥികള്‍ ഉള്‍പ്പെടെ അമിത വേഗതയില്‍ വാഹനം ഓടിക്കുന്നതു കാരണം കാല്‍നടയാത്രക്കാര്‍ പേടിയോടെയാണ് യാത്ര ചെയ്യുന്നത്. ഇതേ തുടര്‍ന്നാണ് പൊലിസ് പരിശോധന കര്‍ശനമാക്കിയത്. പിടിയിലായവരില്‍ മതിയായ രേഖകള്‍ ഇല്ലാത്തവരും ഹെല്‍മെറ്റ് ധരിക്കാതെ വണ്ടിയോടിച്ചവരും മൂന്നു പേരുമായി യാത്ര ചെയ്തവരുമുള്‍പ്പെടും. വരും ദിവസങ്ങളിലും പരിശോധന കര്‍ശനമാക്കുമെന്ന് പൊലിസ് അറിയിച്ചു.