കൊല്ലം: പഴയ ആശാന്‍ ടീ ഷോപ്പിലെ ആവി പറക്കുന്ന ചായയുടെ മേമ്പൊടിക്കഥകളില്‍ നിന്ന് കേശവദേവിന്റെ ഓടയില്‍ നിന്നിന്റെ എഴുത്തുപുരയിലെ വിശേഷങ്ങളിലെത്തുമ്പോള്‍ ചിന്നക്കട മണിമേടക്ക് താഴെ സൗഹൃദങ്ങളുടെ ഇരിപ്പിടങ്ങള്‍ നിറഞ്ഞുകവിഞ്ഞിരുന്നു.
മണിമേടയുടെ സ്‌നേഹ സാമീപ്യത്തില്‍ വളര്‍ന്നവര്‍ പ്രായവ്യത്യാസങ്ങള്‍ മറന്ന് തങ്ങളുടെ മധുര സ്മരണകള്‍ പങ്കുവച്ചപ്പോള്‍ ഔദ്യോഗിക ഭാഷാവാരചണവുമായി ബന്ധപ്പെട്ട് നടന്ന 'മണിമേടയും മലയാളവും' ചര്‍ച്ച വേറിട്ട അനുഭവമായി. രാജ്യ സേവന നിരത കെ ജി പരമേശ്വേരന്‍പിള്ളയും മലയാളരാജ്യവും ശ്രീരാമ വിലാസം പ്രസുമൊക്കെ സൃഷ്ടിച്ച കൊല്ലത്തിന്റെ ഭാഷാപൈതൃകം ചരിത്രത്തില്‍ നിന്ന് വാക്കുകളായി പുനര്‍ജനിച്ചു. കൊല്ലത്തിന്റെ പ്രതീകമായ ചിന്നക്കട മണിമേടയുടെ ചരിത്രത്തിന്റെ നാള്‍വഴികള്‍ പുതിയ തലമുറയ്ക്ക് അത്ഭുതമായി. മണിമേടയില്‍ പുസ്തക കടകളില്‍ തല കുമ്പിട്ട് വിശപ്പിനെ മറന്ന നാളുകള്‍ പലരും ഗൃഹാതുരതയോടെ ഓര്‍മിച്ചെടുത്തു.
ചിന്നക്കട മണിമേടയുടെ സമീപത്തുള്ള സ്ഥലം സാംസ്‌കാരിക ചത്വരമായി വികസിപ്പിക്കണമെന്ന് ഡോ .ബി .എ. രാജകൃഷ്ണന്‍ നിര്‍ദേശിച്ചു. ചിന്നക്കട മേല്‍പ്പാലത്തില്‍ നിന്ന് താഴേക്കിറങ്ങാനുള്ള പടികള്‍ പുനസ്ഥാപിക്കണമെന്ന് കാഥികന്‍ വി .ഹര്‍ഷകുമാര്‍ പറഞ്ഞു. മണിമേടയുടെ ചരിത്രവും ഭാവിയും അടയാളപ്പെടുത്തുന്ന സ്മരണിക പുറത്തിറക്കണമെന്ന് കെ .പി .നന്ദകുമാര്‍ അഭിപ്രായപ്പെട്ടു. മണിമേടയുടെ ചരിത്രം ഉണ്ണികൃഷ്ണന്‍ ഉളിയക്കോവില്‍ അവതരിപ്പിച്ചു. മണിമേടയുടെ സ്ഥാപകദിനാഘോഷം, പ്രതിമാസ കലാപരിപാടികളുടെ സംഘാടനം, കൊല്ലത്തിന്റെ വാണിജ്യ, വ്യാപാര സാധ്യതകള്‍ തുടങ്ങിവയും ചര്‍ച്ചയുടെ ഭാഗമായി ഉയര്‍ന്നുവന്നു.
ആശ്രാമം ഭാസി, എച്ച് ബെയ്‌സില്‍ ലാല്‍, ഷെന്‍ലേ, ജോര്‍ജ് എഫ് സേവ്യര്‍, ജി ആര്‍ കൃഷ്ണകുമാര്‍, എ എ ലത്തിഫ്, എസ് നടരാജന്‍, എം എ സലാം, എസ് സുശീല, എസ് ഓമനക്കുട്ടന്‍, എസ് കണ്ണന്‍, എന്‍ രഘുനാരായണന്‍ തുടങ്ങി നിരവധിപേര്‍ ചര്‍ച്ചയില്‍ പങ്കാളികളായി. ജില്ലാ ഭരണകൂടവും ഇന്‍ഫര്‍മേഷന്‍പബ്ലിക് റിലേഷന്‍സ് വകുപ്പും സംയുക്തമായാണ് പരിപാടി സംഘടിപ്പിച്ചത്.