ഏറ്റുമാനൂര്‍: കഞ്ചാവുമായി യുവാവ് പിടിയില്‍. കൈപ്പുഴ പെരുമ്പള്ളിപറമ്പില്‍ രമേശന്റെ മകന്‍ അഖിലാണ് (24) ഇന്നലെ ഏറ്റുമാനൂര്‍ എക്‌സൈസിന്റെ പിടിയിലായത്.
രാവിലെ ഏഴുമണിയോടെ പട്രോളിങിനിടെ അതിരമ്പുഴ കൈപ്പുഴ റോഡില്‍ പുളിങ്കാല കവലയില്‍ സംശയാസ്പദമായി കണ്ടതിനെ തുടര്‍ന്ന് പിടികൂടിയ അഖിലിന്റെ കൈയില്‍ നിന്നും അഞ്ച്ഗ്രാം കഞ്ചാവിന്റെ പൊതി പിടിച്ചെടുത്തു.
കൈപ്പുഴ, നീണ്ടൂര്‍, മാന്നാനം ഭാഗത്ത് കഞ്ചാവ് കച്ചവടം നടത്തുന്ന സംഘത്തിലെ കണ്ണിയാണ് അഖില്‍. തേനി, കുമളി ഭാഗത്തു നിന്നും ഏജന്റ്്മാര്‍ മുഖേന എത്തുന്ന കഞ്ചാവ് പൊതിയോന്നിന് 250 രൂപാ നിരക്കിലാണ് വില്‍പന നടത്തുന്നത്. സ്‌കൂളുകളും കോളേജുകളുമാണ് ഇവരുടെ പ്രധാന കച്ചവട കേന്ദ്രം. ഇരുചക്രവാഹനങ്ങള്‍ അപകടകരമാം വിധം ഓടിക്കുന്ന ചെറുപ്പക്കാര്‍ കഞ്ചാവിനടിമകളാണെന്നാണ് എക്‌സൈസ് ഉദ്യോഗസ്ഥര്‍ പറയുന്നത്.
മദ്യംകഴിച്ച ശേഷം വാഹനമോടിച്ചാല്‍ പൊലിസ് പിടികൂടുമെന്നതാണ് ഇവര്‍ കഞ്ചാവിലേക്ക് തിരിയാന്‍ കാരണമെന്നും പറയുന്നു. ഏറ്റുമാനൂര്‍ കോടതിയില്‍ഹാജരാക്കിയ പ്രതിയെ റിമാന്റ് ചെയ്തു.
റേഞ്ച് ഇന്‍സ്‌പെക്ടര്‍ എന്‍.വി സന്തോഷ്‌കുമാറിന്റെ നേതൃത്വത്തിലായിരുന്നു അറസ്റ്റ്. പ്രിവന്റീവ് ഓഫിസര്‍ പി.പി നിസാര്‍, സിവില്‍ ഓഫിസര്‍മാരായ തോമസ് ചെറിയാന്‍,കെ രഞ്ജിത്, ടി.എം ശ്രീകാന്ത്, കെ.വി അനീഷ്‌കുമാര്‍,സുരേഷ് ബാബു എന്നിവരും സംഘത്തില്‍ ഉണ്ടായിരുന്നു.