രാജ്‌കോട്ട്: ഇന്ത്യയ്‌ക്കെതിരായ ഒന്നാം ക്രിക്കറ്റ് ടെസ്റ്റില്‍ ഇംഗ്ലണ്ട് മികച്ച സ്‌കോറിലേക്ക്. ഒന്നാം ദിനം കളി നിര്‍ത്തുമ്പോള്‍ ഇംഗ്ലണ്ട് നാലു വിക്കറ്റ് നഷ്ടത്തില്‍ 311 എന്ന ശക്തമായ നിലയില്‍. ജോ റൂട്ടിന്റെ സെഞ്ചറിയും (124) 99 റണ്‍സോടെ പുറത്താകാതെ നില്‍ക്കുന്ന മൊയിന്‍ അലിയുടേയും ബാറ്റിങ് കരുത്തിലാണ് ഇംഗ്ലീഷ് നിര ആദ്യ ദിനത്തില്‍ മികച്ച സ്‌കോര്‍ സ്വന്തമാക്കിയത്. റൂട്ടും അലിയും ചേര്‍ന്ന നാലാം വിക്കറ്റ് കൂട്ടുകെട്ട് 179 റണ്‍സ് ചേര്‍ത്ത് ഇന്നിങ്‌സിനു ബലം നല്‍കി. കരിയറിലെ 11ാം ടെസ്റ്റ് സെഞ്ച്വറിയാണ് റൂട്ട് രാജ്‌കോട്ടില്‍ അടിച്ചെടുത്തത്. 11 ഫോറും ഒരു സിക്‌സും പറത്തിയാണ് റൂട്ട് ശതകം പിന്നിട്ടത്.
ടോസ് നേടി ബാറ്റിങ് തിരഞ്ഞെടുത്ത ഇംഗ്ലണ്ടിനു ഓപണര്‍മാര്‍ ഭേദപ്പെട്ട തുടക്കം നല്‍കി. ക്യാപ്റ്റന്‍ അലിസ്റ്റര്‍ കുക്കും അരങ്ങേറ്റ ടെസ്റ്റിനിറങ്ങിയ 19കാരന്‍ ഹസീബ് ഹമീദും ചേര്‍ന്ന സഖ്യം ഒന്നാം വിക്കറ്റില്‍ 47 റണ്‍സ് കൂട്ടിച്ചേര്‍ത്തെങ്കിലും സ്‌കോര്‍ 102 എത്തിയപ്പോഴേയ്ക്കും മൂന്നു വിക്കറ്റുകള്‍ വീണത് ഇംഗ്ലീഷ് നിരയെ വെട്ടിലാക്കി. എന്നാല്‍ നാലാം വിക്കറ്റില്‍ റൂട്ട്- അലി സഖ്യം ഒത്തു ചേര്‍ന്നതോടെ കടിഞ്ഞാണ്‍ ഇന്ത്യക്ക് നഷ്ടമായി. കളി അവസാനിക്കുമ്പോള്‍ മൊയിന്‍ അലിക്കൊപ്പം 19 റണ്‍സോടെ ബെന്‍ സ്റ്റേക്‌സ് ക്രീസില്‍. ഇന്ത്യയ്ക്കു വേണ്ടി അശ്വിന്‍ രണ്ടും ഉമേഷ് യാദവ്, രവീന്ദ്ര ജഡേജ എന്നിവര്‍ ഓരോ വിക്കറ്റും നേടി.