കൊടുങ്ങല്ലൂര്‍: കൊടുങ്ങല്ലൂര്‍,കയ്പമംഗലം നിയോജക മണ്ഡലങ്ങളിലെ വോട്ടെണ്ണലിന് വേദിയാകുന്ന പുല്ലൂറ്റ് കെ.കെ.ടി.എം ഗവ. കോളജില്‍ ഒരുക്കങ്ങള്‍ ആരംഭിച്ചു. 157 ബൂത്തുകളുള്ള കൊടുങ്ങല്ലൂര്‍ നിയോജക മണ്ഡലത്തില്‍ വോട്ടെണ്ണലിനായി 14 ടേബിളുകളാണ് ഒരുക്കുന്നത്. ഇതിനു പുറമെ റിട്ടേണിങ് ഓഫിസര്‍ക്കായി മറ്റൊരു ടേബിളും ഉണ്ടാകും. ഈ ടേബിളിലാണ് പോസ്റ്റല്‍ വോട്ടുകള്‍ എണ്ണുക. ഏകദേശം പതിനൊന്ന് റൗണ്ടോടെ കൊടുങ്ങല്ലൂര്‍ മണ്ഡലത്തിലെ വോട്ടെണ്ണല്‍ അവസാനിക്കും. 137 ബൂത്തുകളുള്ള കയ്പമംഗലം നിയോജക മണ്ഡലത്തില്‍ വോട്ടെണ്ണലിനായി 14 ടേബിളുകളാണ് ഒരുക്കുന്നത്. പത്ത് റൗണ്ട് പൂര്‍ത്തിയാകുന്നതോടെ കയ്പമംഗലം നിയോജക മണ്ഡലത്തിലെ വോട്ടെണ്ണല്‍ പൂര്‍ത്തിയാകും. രണ്ട് നിയോജക മണ്ഡലങ്ങളിലെയും ഇലക്ട്രോണിക് വോട്ടിങ് യന്ത്രങ്ങള്‍ കെ.കെ.ടി.എം കോളജിലാണ് സൂക്ഷിച്ചിരിക്കുന്നത്. നാളെ രാവിലെ 8 മണിക്ക് വോട്ടെണ്ണല്‍ ആരംഭിക്കും. എട്ടരയോടെ ആദ്യ ഫലങ്ങള്‍ ലഭിച്ചു തുടങ്ങും.