പടിഞ്ഞാറ്റുമുറി: പടിഞ്ഞാറ്റുമുറിയിലെയും പരിസര പ്രദേശങ്ങളിലെയും മികച്ച ഫുട്‌ബോള്‍ താരങ്ങളെ കണ്ടെത്തി വളര്‍ത്തിയെടുക്കുന്നതിനായി ഫസ്ഫരി എജ്യൂക്കേഷന്‍ കോംപ്ലക്‌സിനു കീഴില്‍ ചെറിയ കുട്ടികള്‍ക്കു വേണ്ടിയുള്ള പരിശീലനത്തിനു തുടക്കമായി. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് പി.കെ ശംസുദ്ദീന്‍ ഉദ്ഘാടനം ചെയ്തു.അറുപതു കുട്ടികളാണ് ക്യാംപില്‍ പങ്കെടുക്കുന്നത്. ആറു മാസം നീണ്ടുനില്‍ക്കുന്ന ക്യാംപില്‍ മികവുതെളിയിക്കുന്ന മുപ്പതു വിദ്യാര്‍ഥികളെ തെരഞ്ഞെടുത്തു രണ്ടു വര്‍ഷത്തെ വിദഗ്ധ പരിശീലനത്തിനുള്ള പദ്ധതിക്കാണ് തുടക്കംകുറിച്ചത്. സംസ്ഥാന സബ് ജൂനിയര്‍, ജൂനിയര്‍ ടീമിന്റെ പരിശീലകനും ഓര്‍ഫനേജ് യു.പി സ്‌കൂള്‍ കായികാധ്യാപകനുമായ അഹമ്മദ് നിഷാദാണ് പരിശീലകന്‍. ഡോ. അബ്ദുല്‍ റഹ്മാന്‍ മുബാറക് അധ്യക്ഷനായി. ജാഫര്‍ വെള്ളേക്കാട്ട്, ഇ.സി നാസര്‍ സംസാരിച്ചു.


മണല്‍ സ്‌ക്വാഡ് അംഗങ്ങളെ അപായപ്പെടുത്താന്‍ ശ്രമം;മൂന്നുപേര്‍ അറസ്റ്റില്‍

പെരിന്തല്‍മണ്ണ: കഴിഞമാസം 12നു കൊളത്തൂര്‍ ചെമ്മലശ്ശേരിയില്‍ മണല്‍സ്‌ക്വാഡ് അംഗങ്ങള്‍ സഞ്ചരിച്ചിരുന്ന വാഹനത്തെ ലോറിയിടിപ്പിച്ച സംഘത്തിലെ മൂന്നു പേര്‍ അറസ്റ്റില്‍. വളപുരം പള്ളിപ്പടി മുനീര്‍ ബാബു (24), കൊളത്തൂര്‍ അബ്ദുല്‍ ജലീല്‍ (26), പാലൂര്‍ ചെട്ടിയങ്ങാടി ശ്രീജിത്ത് (24) എന്നിവരാണ് പ്രതികള്‍. ഒളിവിലായിരുന്ന ഇവരെ ഇന്നലെ വൈകിട്ട് കൊളത്തൂര്‍ കുറുപ്പത്താലില്‍നിന്നാണ് എസ്.ഐ വിഷ്ണുവിന്റെ നേതൃത്വത്തിലുള്ള പൊലിസ് അറസ്റ്റ് ചെയ്തത്.