അരീക്കോട്: നിര്‍ത്തിയിട്ട ലോറിക്കു തീപിടിച്ചു മൂന്നുപേര്‍ക്കു പരുക്കേറ്റു. കുറ്റൂളി ജങ്ഷനില്‍ നിര്‍ത്തിയിട്ട ടോറസ് ലോറിക്കാണു തീപിടിച്ചത്. ലോറിയില്‍നിന്നു തീപടരുന്നത് ശ്രദ്ധയില്‍പെട്ട പ്രദേശവാസികള്‍ തീയണക്കാന്‍ ശ്രമിക്കുന്നതിനിടെ കുനിയില്‍ സ്വദേശി പെരുമ്പളത്ത് ജംഷീദ്, ലോറി ജീവനക്കാരായ രാജു, ലാലു എന്നിവര്‍ക്കാണു പരുക്കേറ്റത്. ദേഹമാസകലം പൊള്ളലേറ്റ ജംഷീദ് സമീപത്തുള്ള കാട്ുമൂടിയ കിണറ്റിലേക്ക് എടുത്തുചാടുകയായിരുന്നു. ഗുരുതരമായി പരുക്കേറ്റ ഇയാളെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. ലോറിക്കു പരിസരത്തുനിന്നു പുകവലിച്ചവരില്‍നിന്നു ടാങ്കിലേക്ക് തീപ്പൊരികള്‍ വീണതാകാം അപകടത്തിനു കാരണമെന്നു കരുതുന്നു.
തീപടര്‍ന്നതോടെ ലോറിയുടെ ടാങ്ക് പൊട്ടിത്തെറിച്ചു. നാട്ടുകാരുടെയും മുക്കം ഫയര്‍ഫോഴ്‌സിന്റെയും നേതൃത്വത്തിലാണു തീയണച്ചതും കിണറ്റില്‍ വീണ ജംഷീദിനെ പുറത്തെടുത്തതും. കൊഴക്കോട്ടൂര്‍ സ്വദേശി പ്രദീപ് കുമാറിന്റെതാണു ലോറി. നാലു ലക്ഷം രൂപയുടെ നഷ്ടം കണക്കാക്കുന്നുണ്ട്.