ചെറുതുരുത്തി: കഴിഞ്ഞ ദിവസം രേഖപ്പെടുത്തിയ വോട്ടിങ് മെഷീനുകള്‍ കനത്ത സുരക്ഷയില്‍. തോക്കേന്തിയ കേന്ദ്രസേനയുടെ ജാഗ്രതയിലാണ് വോട്ടിങ് മെഷീനുകള്‍. ചേലക്കര നിയോജക മണ്ഡലത്തിലെ വോട്ടെണ്ണല്‍ ചെറുതുരുത്തി ഗവണ്‍മെന്റ് ഹയര്‍ സെക്കന്ററി സ്‌കൂളില്‍ വെച്ചാണ് നടക്കുക. 152 ബൂത്തുകളിലേയും വോട്ടിങ് മെഷീനുകള്‍ ഇവിടെയാണ് സൂക്ഷിച്ചിട്ടുള്ളത്. വോട്ടെണ്ണല്‍ കേന്ദ്രം മാറ്റിയെന്ന തരത്തില്‍ ചില മാധ്യമങ്ങളില്‍ വന്ന വാര്‍ത്ത ശരിയല്ലെന്നും വോട്ടെണ്ണലിനുള്ള എല്ലാ ഒരുക്കങ്ങളും പൂര്‍ത്തിയായതായും അസിസ്റ്റന്റ് റിട്ടേണിങ് ഓഫിസര്‍ വി.ജെ ജോസഫ് അറിയിച്ചു. കുന്നുംകുളം നിയോജക മണ്ഡലം തല വോട്ടെണ്ണല്‍ വടക്കാഞ്ചേരി ഗവണ്‍മെന്റ് ഹയര്‍ സെക്കന്ററി സ്‌കൂളില്‍ വെച്ചാണ് നടക്കുക.