മൂവാറ്റുപുഴ: ജില്ലാ ശാസ്ത്രമേളയില്‍ കളിമണ്ണില്‍ തീര്‍ത്ത ശില്‍പങ്ങളുമായി മുളവൂര്‍ എം.എസ്.എം.സ്‌കൂളിലെ നാലാം ക്ലാസ് വിദ്യാര്‍ത്ഥി അര്‍ജുന്‍ സ്വരൂപ് ശ്രദ്ധേയമായി.
മൂവാറ്റുപുഴ തര്‍ബിയത്ത് വൊക്കേഷണല്‍ ഹയര്‍സെക്കണ്ടറി സ്‌കൂളില്‍ നടന്ന എല്‍.പി വിഭാഗം തത്സമയ നിര്‍മാണ മത്സരത്തില്‍ അര്‍ജുന്‍ സ്വരൂപിന്റെ കരവിരുതില്‍ വിരിഞ്ഞത് മധുരമൂറും പഴവര്‍ഗങ്ങള്‍. കളിമണ്ണില്‍ രൂപപ്പെടുത്തിയെടുത്ത മുന്തിരി, പപ്പായ, നാരങ്ങ, സ്ലോബറി, മാമ്പഴം, ആപ്പിള്‍ ഓറഞ്ച് അടക്കമുള്ള നാവില്‍ കൊതിയൂറും പഴവര്‍ഗങ്ങള്‍ നിര്‍മിച്ചത്.
കളിമണ്ണ് വെള്ളമുപയോഗിച്ച് കുഴച്ച ശേഷമാണ് പഴവര്‍ഗങ്ങള്‍ നിര്‍മിച്ചത്. തത്സമയ നിര്‍മാണമായതിനാല്‍ സ്‌കൂളിലെത്തിയ ശേഷമാണ് ചെളികുഴച്ച് പഴങ്ങളുടെ രൂപങ്ങള്‍ നിര്‍മിച്ചത്. മാതാവ് രജിതയുടെ ശിക്ഷണത്തിലാണ് അര്‍ജുന്‍ സ്വരൂപ് പരിശീലനം നേടിയത്.