ആലുവ : ബിയറുമായി വന്ന ലോറികള്‍ക്ക് തീപിടിച്ചു. രണ്ടുലോഡ് ബിയര്‍ കത്തി നശിച്ചു. ഉടന്‍ ഫയര്‍ഫോഴ്‌സ് എത്തി തീ അണച്ചതുകൊണ്ട് അപായമോ മറ്റ് ദുരന്തങ്ങളോ ഉണ്ടായില്ല. ആലുവ ചൂണ്ടിയിലെ സിവില്‍ സപ്ലൈസ് ഗോഡൗണില്‍ സ്റ്റോക്ക് ചെയ്യുന്നതിനായി പാലക്കാട്ട് നിന്നും വന്ന രണ്ടു ലോറികളിലാണ് തീപിടുത്തമുണ്ടായത്. ഗോഡൗണിനടുത്ത് റോഡരികില്‍ പാര്‍ക്ക് ചെയ്തിരുന്ന ലോറികളില്‍ സമീപത്ത് കത്തിക്കൊണ്ടിരുന്ന ചവറുകൂനയില്‍ നിന്ന് തീപടര്‍ന്നതാകാമെന്നതാണ് പ്രാഥമിക നിഗമനം.
ഒരു ലോറിയിലെ 25 ശതമാനത്തോളം ബിയറുകുപ്പികള്‍ കത്തിനശിച്ചു.ഒരു ലോറിയുടെ പ്ലാറ്റ്‌ഫോം കത്തിനശിച്ചിട്ടുണ്ട്. അതിലെ ബിയറുകള്‍ക്ക് എത്രമാത്രം നാശം സംഭവിച്ചുമെന്ന് പരിശോധിച്ചുവരികയാണ്. ഇന്നലെ ഉച്ചയ്ക്ക് രണ്ട് മണിക്കാണ് സംഭവം. ആലുവ ഫയര്‍ഫോഴ്‌സ് സംഘം കഠിനപ്രയത്‌നത്തിലൂടെയാണ് തീയണച്ചത്. തക്കസമയത്ത് തീ കെടുത്താനുള്ള ശ്രമം നടത്തിയതിനാല്‍ വന്‍ദുരന്തങ്ങള്‍ ഒഴിവായി. നഷ്ടം എത്രയെന്ന് കണക്കാക്കിയിട്ടില്ല.