പുന്നയൂര്‍ക്കുളം(തൃശൂര്‍): സ്‌പെഷല്‍ ബ്രാഞ്ച് ഉദ്യോഗസ്ഥന്റെ വീടിനു മുന്നില്‍ നിര്‍ത്തിയിട്ട കാറും ബൈക്കും അജ്ഞാതര്‍ അഗ്നിക്കിരയാക്കി.
വടക്കേക്കാട് പൊലിസ് സ്റ്റേഷന്‍ പരിധിയിലെ സ്റ്റേറ്റ് സ്‌പെഷല്‍ ബ്രാഞ്ച് എ.എസ്.ഐ പുന്നയൂര്‍ക്കുളം മാവിന്‍ ചുവട് സ്വദേശി വൈശ്യം വീട്ടില്‍ അഷ്‌റഫിന്റെ വാഹനങ്ങളാണ് അഗ്നിക്കിരയാക്കിയത്. ബുധനാഴ്ച രാത്രി 12 നും 1.15 നുമിടയിലാണ് സംഭവം. വീടിന്റെ മുന്നില്‍ കാറിന് സമീപത്താണ് ബൈക്ക് നിര്‍ത്തിയിട്ടിരുന്നത്. തീ ആളിപ്പടരുന്നത് കണ്ടാണ് അഷ്‌റഫും പരിസരവാസികളും സംഭവമറിയുന്നത്. വിവരമറിഞ്ഞ് വടക്കേക്കാട് അഡീഷണല്‍ എസ്.ഐ വി.ജെ ജോണും സംഘവും സ്ഥല ത്തെത്തി. കാറിന്റെ എന്‍ജിന്‍ ഉള്‍പ്പെടെയുള്ള ഭാഗങ്ങള്‍ പൂര്‍ണമായി കത്തിനശിച്ചു. കാറിനു സമീപത്ത് നിന്ന് ഭാഗികമായി കത്തിയ ഒരു കൊതുമ്പു കണ്ടെത്തിയിട്ടുണ്ട്. തീ കത്തിക്കാനുപയോഗിച്ചതാണിതെന്നു കരുതുന്നു. വീടിന്റെ പിന്‍ഭാഗത്ത് ഒരുകാര്‍ വന്നു പോയതിന്റെ അടയാളവും അന്വേഷണ ഉദ്യോസ്ഥരുടെ ശ്രദ്ധയില്‍ പെട്ടിട്ടുണ്ട്.
ചാവക്കാട് സ്റ്റേഷന്‍ പരിധിയില്‍ നിന്ന് അടുത്തിടെയാണ് അഷ്‌റഫ് വടക്കേക്കാടിലേക്ക് മാറിയത്. സമീപ കാലത്ത് നടന്ന ഹാന്‍സ്, കഞ്ചാവ് വേട്ടകളില്‍ ഇദ്ദേഹത്തിന്റെ പങ്കാളിത്തവും സാന്നിധ്യവുമുണ്ടായിരുന്നു. പ്രദേശത്ത് സജീവമായി പ്രവര്‍ത്തിക്കുന്ന മദ്യ, മയക്കു മരുന്നു മാഫിയയാണ് സംഭവത്തിന് പിന്നിലെന്നും പൊലിസ് സംശയിക്കുന്നുണ്ട്.