തൈക്കടപ്പുറം: ചൂടു വര്‍ധിച്ചതോടെ മയിലുകള്‍ കൂട്ടത്തോടെ നാട്ടിലിറങ്ങി തുടങ്ങി. ജില്ലയുടെ വിവിധ ഭാഗങ്ങളില്‍ ഇത്തരത്തില്‍ മയിലുകള്‍ നാട്ടിലിറങ്ങിയിട്ടുണ്ട്. നീലേശ്വരം നഗരസഭയിലും മലയോര പഞ്ചായത്തുകളിലും ഇവ വ്യാപകമായുണ്ട്.
കഴിഞ്ഞ ദിവസം തൈക്കടപ്പുറം മുപ്പത്തിക്കണ്ടം വയലില്‍ പത്തോളം മയിലുകളെത്തി. കൃഷിയിടങ്ങളിലെത്തുന്ന ഇവ കൃഷി നശിപ്പിക്കുന്നതു കര്‍ഷകര്‍ക്കു ദുരിതമാകുന്നുണ്ട്. പകല്‍ മുഴുവന്‍ വയലേലകളിലും പറമ്പുകളിലും തീറ്റ തേടുന്ന ഇവ രാത്രിയായാല്‍ മരങ്ങളിലാണു താമസം. മനുഷ്യരെ പേടിയില്ലാതെ ഇവ സഞ്ചരിക്കുന്നു എന്നതാണു മറ്റൊരു പ്രത്യേകത. വീടുകളുടെ മുറ്റത്തെത്തുന്ന മയിലുകള്‍ക്കു ഭക്ഷണം നല്‍കാന്‍ കുട്ടികള്‍ മത്സരിക്കുകയാണ്. അതേസമയം മയിലുകളെ പിടികൂടി കൊന്നൊടുക്കുന്നതായും പരാതി ഉയര്‍ന്നിട്ടുണ്ട്.