ബെലോ ഹൊറിസോണ്ടെ: ലാറ്റിനമേരിക്കയിലെ വമ്പന്‍മാരുടെ പോരില്‍ ലോകകപ്പ് റണ്ണറപ്പുകളായ അര്‍ജന്റീനയെ എതിരില്ലാത്ത മൂന്നു ഗോളിന് തകര്‍ത്ത് ബ്രസീല്‍ വമ്പുകാട്ടി. ഫിലിപ്പ് കുട്ടീഞ്ഞോ, നെയ്മര്‍, പൗലീഞ്ഞോ എന്നിവര്‍ ബ്രസീലിനായി സ്‌കോര്‍ ചെയ്തു. തുടര്‍ച്ചയായ നാലാം മത്സരത്തിലാണ് അര്‍ജന്റീന ജയമില്ലാതെ മടങ്ങുന്നത്.
ലയണല്‍ മെസ്സിയടക്കമുള്ള സൂപ്പര്‍ താരങ്ങളുമായി കളത്തിലിറങ്ങിയ അര്‍ജന്റീന വമ്പന്‍ ജയം നേടുമെന്നാണ് പ്രതീക്ഷിച്ചിരുന്നത്. ജര്‍മനിയോട് ലോകകപ്പില്‍ വമ്പന്‍ തോല്‍വി നേരിട്ട സ്റ്റേഡിയത്തില്‍ ജയത്തില്‍ കുറഞ്ഞതൊന്നും ബ്രസീലും പ്രതീക്ഷിച്ചിരുന്നില്ല. തുടക്കത്തില്‍ പ്രതിരോധത്തിലാണ് ഇരു ടീമുകളും കളിച്ചത്. പതിയെ താളം വീണ്ടെടുക്കാന്‍ ഇരുടീമുകള്‍ക്കും ലാധിച്ചു.
ആദ്യം അവസരം ലഭിച്ചത് ബ്രസീലിനാണ്. റെനാറ്റോ അഗസ്റ്റോയുടെ തകര്‍പ്പനൊരു ഷോട്ട് പുറത്തേക്ക് പോയി. തൊട്ടുപിന്നാലെ അര്‍ജന്റീന താരം ലൂക്കാസ് ബിഗ്ലിയയുടെ ഷോട്ട് അലിസന്‍ മനോഹരമായി സേവ് ചെയ്തു.
25ാം മിനുട്ടില്‍ മിന്നല്‍ ഗോളിലൂടെ ബ്രസീല്‍ അക്കൗണ്ട് തുറന്നു. അര്‍ജന്റീന പ്രതിരോധതാരങ്ങള്‍ വെട്ടിച്ച് 20 വാര അകലെ നിന്ന് കുട്ടീഞ്ഞോ തൊടുത്ത ഷോട്ട് വലയില്‍ കയറുകയായിരുന്നു. ഒരു ഗോളിന്റെ മുന്‍തൂക്കത്തില്‍ ബ്രസീല്‍ ആദ്യ പകുതി അവസാനിപ്പിക്കും എന്ന് കരുതിയിരിക്കെയായിരുന്നു നെയ്മറുടെ. അധികസമയത്ത് താരം മികച്ച ഷോട്ടിലൂടെ ഗോള്‍ നേടുകയായിരുന്നു. നെയ്മറിന്റെ 50ാം അന്താരാഷ്ട്ര ഗോളായിരുന്നു.
രണ്ടാം പകുതിയില്‍  അര്‍ജന്റീന തിരിച്ചടിക്കുമെന്ന് കരുതിയെങ്കിലും ബ്രസീലിന് തന്നെയായിരുന്നു ആധിപത്യം. പൗലീനോയുടെ തകര്‍പ്പന്‍ ഷോട്ട് സബലേറ്റ സേവ് ചെയ്‌തെങ്കിലും  തൊട്ടുപിന്നീലെ താരം ഗോള്‍ നേടി. തിരിച്ചടിക്കാന്‍ അര്‍ജന്റീന ശ്രമിച്ചെങ്കിലും സൂപ്പര്‍ താരങ്ങള്‍ക്ക് പ്രത്യേകിച്ച് മെസ്സിക്ക് വേണ്ട വിധത്തില്‍ കളിക്കാന്‍ സാധിക്കാതിരുന്നത് തിരിച്ചടിയായി.
മറ്റു മത്സരങ്ങളില്‍ കൊളംബിയ ഗോള്‍ രഹിത സമനിലയില്‍ ചിലിയെ തളച്ചപ്പോള്‍ ഉറുഗ്വെ ഒന്നിനതെിരേ രണ്ടു ഗോളുകള്‍ക്ക് ഇക്വഡോറിനെയും പെറു ഒന്നിനെതിരേ നാലു ഗോളുകള്‍ക്ക് പെറുവിനെയും വെനസ്വല എതിരില്ലാത്ത അഞ്ചു ഗോളിന് ബൊളീവിയയെയും പരാജയപ്പെടുത്തി.