കോഴിക്കോട്: മുസ്‌ലിം യൂത്ത് ലീഗ് സംസ്ഥാന സമ്മേളനത്തില്‍ കാന്തപുരത്തിനെതിരേ ആഞ്ഞടിച്ച് പി.കെ കുഞ്ഞാലിക്കുട്ടി. കഴിഞ്ഞ ദിവസം മണ്ണാര്‍ക്കാട് നടന്ന സമ്മേളനത്തില്‍ കാന്തപുരം പാണക്കാട് ഹൈദരലി ശിഹാബ് തങ്ങള്‍ക്കും പാണക്കാട് കുടുംബത്തിലെ മറ്റ് തങ്ങന്മാര്‍ക്കുമെതിരേ വിമര്‍ശനമുന്നയിച്ചിരുന്നു.
തെരഞ്ഞെടുപ്പില്‍ ആരെയും തോല്‍പിക്കാന്‍ പറഞ്ഞിട്ടില്ലെന്നും അത് തങ്ങളുടെ നിലപാടല്ലെന്നുമാണ് കാന്തപുരം മണ്ണാര്‍കാട് നടന്ന യോഗത്തില്‍ പറഞ്ഞത്. അഡ്വ. എന്‍.
ശംസുദ്ദീനെ ജയിപ്പിക്കരുതെന്ന് കാരന്തൂര്‍ മര്‍ക്കസില്‍ നടന്ന പൂര്‍വ വിദ്യാര്‍ഥി സംഗമത്തില്‍ വച്ച് പ്രഖ്യാപിച്ച കാര്യവും അദ്ദേഹം യോഗത്തില്‍ നിഷേധിച്ചു. പാണക്കാട് തങ്ങളെ വിമര്‍ശിച്ച പശ്ചാതലത്തില്‍ കാന്തപുരത്തിനെതിരേ ശക്തമായ ഭാഷയിലാണ് കുഞ്ഞാലിക്കുട്ടി തിരിച്ചടിച്ചത്.
ശരീഅത്ത് വിഷയങ്ങള്‍ ചര്‍ച്ച ചെയ്യാന്‍ മുസ്‌ലിം ലീഗ് കോഴിക്കോട്ട് വിളിച്ചു ചേര്‍ത്ത സമുദായ സംഘടനകളുടെ സംയുക്ത യോഗത്തില്‍ നിന്നും കാന്തപുരം വിട്ടു നിന്നതിനെ സൂചിപ്പിച്ചായിരുന്നു കുഞ്ഞാലിക്കുട്ടിയുടെ വിമര്‍ശനം.
 'എല്ലാ സംഘടനകളും യോഗത്തില്‍ പങ്കെടുത്തിരുന്നെങ്കിലും കെ.പി.എ മജീദ് ക്ഷണിച്ചിട്ടില്ല എന്നാണ് പരാതിയായി കേള്‍ക്കുന്നത്. ക്ഷണിച്ചാല്‍ തന്നെ മാറി നില്‍ക്കുമെന്ന് പല തവണ തെളിയിച്ചവരാണവര്‍.
രാജ്യം അപകടപ്പെടുമ്പോള്‍ കല്യാണത്തിന് ക്ഷണിക്കുന്നത് പോലെ വിളിക്കില്ല, ഫോണ്‍ വിളിച്ച് വിവരം പറഞ്ഞാല്‍ ആ സമയത്ത് തന്നെ ഒരുമിച്ച് കൂടണം.'അതൊന്നുമല്ല, അത് വേറൊരു സൂക്കേടാണ്. ആ സൂക്കേട് തലയുള്ള കാലം ജലദോശം മാറില്ലെന്ന് പറഞ്ഞതുപോലെയാണ് ' കുഞ്ഞാലിക്കുട്ടി പറഞ്ഞു. തെരഞ്ഞെടുപ്പില്‍ ഒരു നിറവും തെരഞ്ഞെടുപ്പ് കഴിഞ്ഞാല്‍ മറ്റൊരു നിറവുമാണിവര്‍ക്ക്. മുസ്‌ലിം ലീഗിനെ വെല്ലുവിളിക്കാന്‍ അത്ര എളുപ്പമല്ല എന്ന് മണ്ണാര്‍ക്കാട് എം.എല്‍.എയിലൂടെ തെളിഞ്ഞിട്ടുണ്ട്.
അനാവശ്യമായി ലീഗിനെ വെല്ലുവിളിക്കുന്നത് കാണുമ്പോള്‍ ചിലപ്പൊ വെല്ലുവിളിച്ച് കിട്ടിയാല്‍ എന്ന് വരെ തോന്നിപ്പോയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.  ന്യൂനപക്ഷങ്ങള്‍ക്ക് ചീത്തപ്പേരുണ്ടാക്കണം എന്ന ലക്ഷ്യത്തിലാണ് ഇത്തരം വിഭാഗങ്ങള്‍ മുന്നോട്ടുപോവുന്നത്. ഏത് മത വിശ്വാസത്തിന്റെ അടിസ്ഥാനത്തിലാണ് ഇവരൊക്കെ പോവുന്നതെന്നും അദ്ദേഹം ചോദിച്ചു. നേരത്തെ മലപ്പുറത്ത് സമസ്ത സംഘടിപ്പിച്ച ശരീഅത്ത് സമ്മേളനത്തില്‍ വച്ചും മുസ്‌ലിം ഐക്യത്തിന് തരങ്കം വയ്ക്കുന്ന കാന്തപുരത്തിന്റെ നിലപാടിനെ കുഞ്ഞാലിക്കുട്ടി പരിഹസിച്ചിരുന്നു.