ചണ്ഡീഗഡ്: സത്‌ലജ്-ബിയാസ് നദികളില്‍ നിന്നും വെള്ളം പങ്കുവെക്കുന്നതുമായി ബന്ധപ്പെട്ട് രൂക്ഷമായ തര്‍ക്കം ഉടലെടുത്തതോടെ ഹരിയാനയില്‍ നിന്നും പഞ്ചാബിലേക്കുള്ള ഗതാഗതം പൂര്‍ണമായും നിര്‍ത്തി. വെള്ളം ആര്‍ക്കും വിട്ടുനല്‍കില്ലെന്ന പഞ്ചാബിന്റെ കടുത്ത നിലപാട് വലിയ പ്രതിഷേധത്തിനാണ് വഴിവച്ചിരിക്കുന്നത്. ഇതേതുടര്‍ന്നാണ് പഞ്ചാബിലേക്കുള്ള ഹരിയാന റോഡ് ട്രാന്‍സ്‌പോര്‍ട്ട് കോര്‍പറേഷന്‍ ബസ് ഉള്‍പ്പടെയുള്ള എല്ലാ വാഹനങ്ങളും താല്‍ക്കാലികമായി നിര്‍ത്തിയത്.
വെള്ളം വിട്ടുനല്‍കുന്നതിനെതിരേ പഞ്ചാബ് നിയമസഭ പാസാക്കിയ പ്രമേയം സുപ്രിംകോടതി തള്ളിയതോടെയാണ് പ്രതിസന്ധി രൂക്ഷമായത്. വെള്ളം വിട്ടുനല്‍കിയില്ലെങ്കില്‍ ഹരിയാന വരണ്ടുണങ്ങുമെന്ന് ചൂണ്ടിക്കാട്ടിയാണ് സുപ്രിം കോടതിയെ സമീപിച്ചിരുന്നത്.  കോടതി നിലപാട് പ്രതിഷേധാര്‍ഹമാണെന്ന് ചൂണ്ടിക്കാട്ടി കോണ്‍ഗ്രസ് എം.പി അമരീന്ദര്‍ സിങ്, നിയമസഭയിലെ 42 എം.എല്‍.എമാര്‍ എന്നിവര്‍ രാജിവെക്കുകയും ചെയ്തു. ഈ പ്രതിസന്ധിക്കിടയിലാണ് ഹരിയാനയില്‍ നിന്നും പഞ്ചാബിലേക്കുള്ള ഗതാഗതം നിര്‍ത്തിവച്ചത്. സ്ഥിതിഗതികള്‍ ശാന്തമാകുന്നതുവരെ സുരക്ഷ മുന്‍നിര്‍ത്തിയാണ് ഗതാഗതം നിര്‍ത്തിവെക്കാന്‍ തീരുമാനിച്ചതെന്ന് ഹരിയാന ചീഫ് സെക്രട്ടറി സുധീപ് സിങ് ധിലോണ്‍ അറിയിച്ചു.