കൊച്ചി: ഐ.എസ്.എല്ലില്‍ സി.കെ വിനീതിന്റെ മികവില്‍  സ്വന്തം തട്ടകത്തില്‍  ചെന്നൈയിനെതിരേ  കേരള ബ്ലാസ്റ്റേഴ്‌സിന് തകര്‍പ്പന്‍ ജയം. ആദ്യസീസണിലെ വിജയം ആവര്‍ത്തിച്ചുകൊണ്ട് ഒന്നിനെതിരെ മൂന്ന് ഗോളുകള്‍ക്കാണ് ചെന്നൈയിനെ സ്വന്തം തട്ടകത്തില്‍ കൊമ്പന്മാര്‍ അടിയറവ് പറയിപ്പിച്ചത്. ഗോവയ്‌ക്കെതിരെ വിജയഗോള്‍ നേടി ഫുട്‌ബോള്‍ പ്രേമികളുടെ ഇഷ്ടതാരമായി മാറിയ സി.കെ വിനീത് തന്നെയാണ് ഇക്കുറിയും ബ്ലാസ്റ്റേഴ്‌സിന്റെ രക്ഷകനായത്. രണ്ടാം പകുതിയുടെ അവസാനത്തില്‍ നേടിയ ഇരട്ടഗോളുകളിലൂടെ വിനീത് മത്സരത്തിലെ താരമായി മാറി.  ഈ ജയത്തോടെ  10 മത്സരങ്ങളില്‍ നിന്നും 15 പോയിന്റോടെ ബ്ലാസ്‌റ്റേഴ്‌സ് രണ്ടാം സ്ഥാനത്തേക്കുയര്‍ന്നു.
റാഫിക്കു പകരം സി.കെ.വിനീത് എത്തിയതുമാത്രമായിരുന്നു ബ്ലാസ്റ്റേഴ്‌സ് നിരയിലെ ഏക മാറ്റം. ചെന്നൈയിന്റെ ആക്രമണത്തോടെയായിരുന്നു തുടക്കം.ബെര്‍ണാര്‍ഡ് മെന്‍ഡിയും റാഫേല്‍ അഗസ്റ്റോയും ആയിരുന്നു തുടര്‍ന്ന് ബ്ലാസ്റ്റേഴ്‌സ് ഗോള്‍ മുഖം കടന്നാക്രമിച്ചത്. രണ്ടുതവണയും കോര്‍ണര്‍ വഴങ്ങി ബ്ലാസ്റ്റേഴ്‌സ് രക്ഷപ്പെട്ടു.. 22 ാം മിനുട്ടില്‍ ഗ്യാലറിയെ നിശബ്ദമാക്കിക്കൊണ്ട് ആദ്യം ഗോള്‍ നേടി. സെന്റര്‍ സര്‍ക്കിളിനുള്ളില്‍ നിന്നും റാഫേല്‍ അഗസ്റ്റോ നീട്ടിക്കൊടുത്ത പാസ്   സ്വീകരിച്ചു സോളോ ആക്രമണം നടത്തിയ ബെര്‍ണാര്‍ഡ് മെന്‍ഡി പുറകെ ഓടിവന്ന പ്രതീക് ചൗധരി, മുഹമ്മദ് റഫീഖ് എന്ന്ിവരെയും മുന്നില്‍ വന്ന സെഡ്രിക് ഹെങ്ബാര്‍ട്, സന്ദേശ് ജിങ്കന്‍ എന്നിവരെയും മറികടന്നു പന്ത് വലയിലാക്കി.(1-0).
കാത്തിരുന്ന ഗോള്‍ കേരള ബ്ലാസ്റ്റേഴ്‌സ്  67 ാം മിനിറ്റില്‍ നേടി. ഹോസുവിന്റെ സെന്റര്‍ സര്‍ക്കിളില്‍ നിന്നുള്ള ലോങ് ബോള്‍ ജെര്‍മെയ്‌നിലേക്ക്. ഇടത്തെ വിങിലൂടെ കുതിച്ച ജെര്‍മെയ്ന്‍ ചെന്നൈ ഡിഫെന്‍ഡര്‍ എല്‍സാബിയോയുടെ കാലുകള്‍ക്കിടയിലൂടെ  ബോക്‌സിനകത്തു വെച്ച് നല്‍കിയ പാസ് ഡിഡിയര്‍ ബോറിസ് കാഡിയോ  ക്ലോസ് റേഞ്ചില്‍ വലകുലുക്കി (1-1).
ഗോള്‍ നേടിയതോടെ ബ്ലാസ്റ്റേഴ്‌സിന്റെ മഞ്ഞക്കടല്‍ ചെന്നൈ ഗോള്‍ മുഖത്തേക്ക് അലയടിച്ചുതുടങ്ങി.  86 ാംമിനിറ്റില്‍ ബ്ലാസ്റ്റേഴ്‌സിന്റെ രണ്ടാം ഗോള്‍ നേടി കൊണ്ട് കളി വീണ്ടെടുത്തു. ഇടത്തെ ഫ്‌ളാഗ് കോര്‍ണറിനു മുന്നില്‍ നിന്നും ഹോസുവിന്റെ പാരലല്‍ ക്രോസ് ചാടി ഉയര്‍ന്ന ചെന്നൈ ഗോളി കെറിന്റെ കൈകളില്‍ നിന്നും വഴുതി. ഓടിവന്ന സി.കെ.വിനീത് അക്രോബാറ്റിക് ഷോട്ടിലൂടെ വലകുലുക്കി.(2-1).  ഈ ഗോളിന്റെ ആരവം അടങ്ങുന്നതിനു മന്‍പ് തന്നെ ബ്ലാസ്റ്റേഴ്‌സ് 89 ാം മിനുട്ടില്‍ മൂന്നാം ഗോളും  നേടി വിജയം ഉറപ്പിച്ചു.