തുറവൂര്‍: വീടിന്റെ ജനല്‍ കൊളുത്ത് തകര്‍ത്ത് അകത്ത് കടക്കാനുള്ള മോഷ്ടാക്കളുടെ ശ്രമം ഗൃഹനാഥന്‍ ഉണര്‍ന്നതിനെ തുടര്‍ന്ന് വിഫലമായി. തുറവൂര്‍ പഞ്ചായത്ത് അഞ്ചാം വാര്‍ഡില്‍ ചേനപ്പറമ്പില്‍ ബെന്നിയുടെ വീട്ടിലാണ് ഇന്നലെ അര്‍ദ്ധരാത്രിയോടെ മോഷണശ്രമം നടന്നത്. ജനലിനരികില്‍ അടുക്കി വച്ചിരുന്ന പാത്രങ്ങള്‍ തഴെ വീഴുന്ന ശബ്ദം കേട്ടുണര്‍ന്ന ബെന്നി ലൈറ്റുകള്‍ തെളിച്ചതോടെ മോഷ് ടാക്കള്‍ ഓടി രക്ഷപ്പെട്ടു. സംഘത്തില്‍ ഒന്നിലധികം പേരുണ്ടായിരുന്നതായി ബെന്നി പറഞ്ഞു.
വിവരമറിയിച്ചതിനെത്തുടര്‍ന്ന് പോലീസ് സ്ഥലത്തെത്തി തിരച്ചില്‍ നടത്തി. കുത്തിയതോട് പോലിസ് കേസെടുത്ത് അന്വേഷണമാരംഭിച്ചു. ഏതാനും  ദിവസം മുമ്പ് തൊട്ടടുത്ത വീടിന്റ ജനല്‍ച്ചില്ലു മോഷ്ടാക്കള്‍ എറിഞ്ഞുതകര്‍ത്തിരുന്നു.  കഴിഞ്ഞ കുറെ നാളുകളായി മേഖലയില്‍ മോഷ്ടാക്കളുടെ ശല്യം രൂക്ഷമായിരിക്കയാണ്. ഒന്നിലേറെപ്പേരുള്ള സംഘങ്ങളായാണ് ഇവിടെ മോഷ്ടാക്കള്‍ എത്തുന്നതെന്ന് നാട്ടുകാര്‍ പറയുന്നു.