നാസിക്: നോട്ട് നിരോധനത്തില്‍ ബുദ്ധിമുട്ടുന്ന ജനങ്ങള്‍ക്ക് ആശ്വാസമായി പുതിയ അഞ്ഞൂറിന്റെ നോട്ട് അച്ചടി പൂര്‍ത്തിയായി. പുതിയ അഞ്ഞൂറിന്റെ നോട്ടുകള്‍ നാസികിലെ പ്രസില്‍നിന്ന് റിസര്‍വ് ബാങ്കില്‍ എത്തിച്ചതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.

പുതിയ നോട്ടിന്റെ  50 ലക്ഷം നോട്ടുകള്‍ റിസര്‍വ് ബാങ്കിലെത്തിച്ചിട്ടുണ്ട്. അടുത്ത ബുധനാഴ്ചയോടെ അടുത്ത 50 ലക്ഷം നോട്ടുകള്‍ കൂടി എത്തിക്കും. കൂടാതെ 20, 50, 100 രൂപയുടെ നോട്ടുകളുടെ അച്ചടി വര്‍ദ്ധിപ്പിക്കുകയും ചെയ്തതായി നാസികിലെ പ്രസ് അധികൃതര്‍ വ്യക്തമാക്കി.

ഇക്കഴിഞ്ഞ ചൊവ്വാഴ്ചയാണ് അഞ്ഞൂറിന്റെയും ആയിരത്തിന്റെയും നോട്ടുകള്‍ പിന്‍വലിക്കുന്നതായി പ്രധാനമന്ത്രി നരേന്ദ്ര മോദി പ്രഖ്യാപിച്ചത്. ഇതിനു പകരമായി രണ്ടായിരത്തിന്റെയും അഞ്ഞൂറിന്റെയും പുതിയ നോട്ടുകള്‍ പുറത്തിറക്കി. എന്നാല്‍ രണ്ടായിരത്തിന്റെ നോട്ടുകള്‍ ജനങ്ങള്‍ക്ക് ലഭ്യമാക്കി തുടങ്ങിയെങ്കിലും അഞ്ഞൂറിന്റെ നോട്ടുകള്‍ ലഭിക്കാതിരുന്നത് ജനങ്ങളെ സാരമായി ബാധിച്ചിരുന്നു.