കണ്ണൂര്‍: വ്യാപാരി വ്യവസായി സമിതി സംസ്ഥാന സമ്മേളനത്തിനു റബ്‌കോ ഓഡിറ്റോറിയത്തില്‍ തുടക്കമായി. സമ്മേളനം മുന്‍ മന്ത്രിയും സി.പി.എം കേന്ദ്രകമ്മിറ്റിയംഗവുമായ ഇ.പി ജയരാജന്‍ എം.എല്‍.എ ഉദ്ഘാടനം ചെയ്തു.
1000, 500 നോട്ടുകള്‍ അസാധുവാക്കി പുതിയ 2000 രൂപ പുറത്തിറക്കി സാമ്പത്തിക പുനഃക്രമീകരണം നടത്തും മുന്‍പ് തന്നെ കള്ളപ്പണക്കാരെ കേന്ദ്രസര്‍ക്കാര്‍ വിവരമറിയിച്ചിരുന്നുവെന്ന് ഇ.പി ജയരാജന്‍ ആരോപിച്ചു.  കള്ളപ്പണക്കാര്‍ക്ക് തടയിടാനും കള്ളനോട്ട് ഇടപാടു തടയുന്നതിനും ഉചിതമായ നയം പുതിയ നോട്ടുകള്‍ പുറത്തിറക്കലും സാമ്പത്തിക പുനഃക്രമീകരണവും തന്നെയായിരുന്നു. എന്നാല്‍ കള്ളപ്പണക്കാര്‍ക്ക് നേരത്തെ വിവരം നല്‍കിയാണ് സാമ്പത്തിക ക്രമീകരണം ഏര്‍പ്പെടുത്തിയത്. ഇതേ തുടര്‍ന്ന് സാധാരണക്കാരായ ജനം മാത്രമാണ് ദുരിതത്തിലായത്. പൊതുജനങ്ങള്‍ക്ക് പണമെത്തിച്ച് മാര്‍ക്കറ്റിലെ ക്രയവിക്രയ ശേഷി വര്‍ധിപ്പിക്കണമെന്നും ഇ.പി ജയരാജന്‍ ആവശ്യപ്പെട്ടു.
ഉദ്ഘാടന സമ്മേളനത്തില്‍ വ്യാപാര വ്യവസായി സമിതി സംസ്ഥാന പ്രസിഡന്റ് ബിന്നി ഇമ്മട്ടി അധ്യക്ഷനായി. സി.പി.എം കേന്ദ്രകമ്മിറ്റിയംഗം എം.വി ഗോവിന്ദന്‍ മുഖ്യപ്രഭാഷണം നടത്തി. പി.കെ ശ്രീമതി എം.പി, കോര്‍പറേഷന്‍ മേയര്‍ ഇ.പി ലത, ലോട്ടറി തൊഴിലാളി ക്ഷേമനിധി ബോര്‍ഡ് ചെയര്‍മാന്‍ എം.വി ജയരാജന്‍ സംസാരിച്ചു. സമിതി സംസ്ഥാന സെക്രട്ടറി ഇ.എസ് ബിജു പ്രവര്‍ത്തന റിപ്പോര്‍ട്ട് അവതരിപ്പിച്ചു. ട്രഷറര്‍ എ.ടി അബ്ദുല്ലക്കോയ വരവു ചെലവ് കണക്ക് അവതരിപ്പിച്ചു.
ഇന്ന്  വൈകുന്നേരം  സ്റ്റേഡിയം കോര്‍ണറില്‍ നടക്കുന്ന പൊതുസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും.