വടക്കാഞ്ചേരി: ജയന്തനും സംഘവും തടഞ്ഞുവച്ച മക്കളെ വിട്ടുതരുന്നതിന് ഇടപെടണമെന്നാവശ്യപ്പെട്ട് സി.പി.എം ജില്ലാ സെക്രട്ടറി കെ രാധാകൃഷ്ണനുമായി ജില്ലാ കമ്മിറ്റി ഓഫിസിലെത്തി സംസാരിച്ചിരുന്നതായി വടക്കാഞ്ചേരി പീഡനത്തിനിരയായ യുവതിയുടെ വെളിപ്പെടുത്തല്‍. സ്ഥലം എം.എല്‍.എ അനില്‍ അക്കരയെ ഹൈക്കോടതി അഭിഭാഷകന്റെ സാന്നിധ്യത്തിലെത്തിയാണ് അവര്‍ ഇക്കാര്യം അറിയിച്ചത്. ജയന്തനും സംഘത്തിനുമെതിരേ 2014ല്‍ നല്‍കിയ പരാതി അതേ വര്‍ഷം ഓഗസ്റ്റ് 13ന് പ്രതികളുടെ സമ്മര്‍ദത്തെ തുടര്‍ന്ന് പിന്‍വലിച്ചിരുന്നു. ഒത്തുതീര്‍പ്പ് വ്യവസ്ഥയുടെ അടിസ്ഥാനത്തില്‍ ഓഗസ്റ്റ് 17ന് തന്റെ മക്കളെ വിട്ടു നല്‍കുമെന്ന ഉറപ്പ് പ്രതികള്‍ ലംഘിച്ചപ്പോള്‍ ഇക്കാര്യം താനും ഭര്‍ത്താവും സി.പി.എം ജില്ലാ കമ്മിറ്റി ഓഫിസിലെത്തി കെ. രാധാകൃഷ്ണനെ അറിയിച്ചു.
ഒക്ടോബര്‍ 23നായിരുന്നു രാധാകൃഷ്ണനെ കണ്ടത്. വിഷയം പരിഹരിക്കാമെന്നായിരുന്നു അദ്ദേഹത്തിന്റെ വാഗ്ദാനമെന്നും യുവതി പറയുന്നു. യുവതിയുടെ വെളിപ്പെടുത്തല്‍ അനില്‍ അക്കര എം.എല്‍.എ വാര്‍ത്താകുറിപ്പിലൂടെയാണ് പുറത്തുവിട്ടത്.  ഭര്‍ത്താവിന്റെ മാതാപിതാക്കള്‍ ഉള്‍പ്പെടെയുള്ളവര്‍ കുട്ടികളെ തടഞ്ഞുവച്ചന്നായിരുന്നു യുവതി ആരോപിച്ചിരുന്നത്.