ന്യൂഡല്‍ഹി: ഉയര്‍ന്നമൂല്യമുള്ള നോട്ടുകള്‍ പിന്‍വലിച്ചതിനു പിന്നാലെ ബാങ്കുകളില്‍ പഴയ 500, 1000 നോട്ടുകളുടെ നിക്ഷേപം രണ്ടുലക്ഷം കോടി രൂപയിലധികമായി. വാരാന്ത്യദിനമായ ശനിയാഴ്ച ഉച്ചവരെ മാത്രം 70 ദശലക്ഷം രൂപയുടെ നിക്ഷേപം നടന്നതായി ധനകാര്യമന്ത്രാലയം വ്യക്തമാക്കി.
500,1000 നോട്ടുകള്‍ പിന്‍വലിച്ചതിനെത്തുടര്‍ന്നാണ് പഴയ നോട്ടുകളുടെ നിക്ഷേപം ബാങ്കുകളിലെത്തിയത്. കയ്യിലുള്ള നോട്ടുകളില്‍ 4000 രൂപവരെ മാത്രമാണ് മാറ്റിയെടുക്കാന്‍ അനുവദിച്ചിട്ടുള്ളത്. ബാക്കിയുള്ളവ ബാങ്കില്‍ നിക്ഷേപിക്കാന്‍ മാത്രമാണ് സാധിക്കുക. രാജ്യത്തെ ആകെ പണത്തിന്റെ 86 ശതമാനം 500,1000 രൂപയുടെ നോട്ടുകളാണ്.
 ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ(എസ്.ബി.ഐ)യിലാണ്ഏറ്റവും കൂടുതല്‍ നിക്ഷേപം നടന്നിരിക്കുന്നത്. 47,868 കോടിയിലധികമാണ് ഇവിടെ ലഭിച്ച നിക്ഷേപം. അതേ സമയം ബാങ്കുകള്‍ക്കും എ.ടിഎമ്മുകള്‍ക്കും മുന്നിലുള്ള തിരക്ക് വരുംദിവസങ്ങളിലും ഇതുപോലെ തുടരുമെന്നാണ് കരുതുന്നത്.
ഇന്ന് ഗുരുനാനാക് ജയന്തി പ്രമാണിച്ച് ചില സംസ്ഥാനങ്ങളില്‍ ബാങ്കുകള്‍ക്ക് അവധിയാണെങ്കിലും തുറന്ന് പ്രവര്‍ത്തിക്കാന്‍ കേന്ദ്രസര്‍ക്കാര്‍ നിര്‍ദേശം നല്‍കിയിട്ടുണ്ട്.