തിരുവനന്തപുരം:500, 1000 രൂപാനോട്ടുകള്‍ പിന്‍വലിച്ചതോടെ നാട്ടിലാകെ അരാജകത്വമായെന്ന് ധനമന്ത്രി തോമസ് ഐസക്. സ്ഥിതി ഇത്ര ഭീകരമാകുമെന്ന് കരുതിയിരുന്നില്ലെന്നും അദ്ദേഹം ഫേസ്ബുക്കിലൂടെ പറഞ്ഞു. കൂലികൊടുക്കാന്‍ കാശില്ലാത്തതുകൊണ്ട് പണികളെല്ലാം നിന്നു. പണിയും കൂലിയും ഇല്ലാത്തതു കൊണ്ട് തൊഴിലാളികളുടെ വീടുകള്‍ പട്ടിണിയായി. ആളുകളുടെ മുഖ്യതൊഴില്‍ ബാങ്കുകളുടെ മുന്നില്‍ ക്യൂ നില്‍ക്കലാണ്. ഏറിയാല്‍ 4000 രൂപ പിന്‍വലിക്കാം. കടകള്‍ തുറന്നിട്ടെന്തിനാണെന്ന് പലവ്യാപാരികളും ചോദിക്കുന്നു.
ചൊവ്വാഴ്ച മുതല്‍ അനിശ്ചിതകാല കടയടപ്പ് പ്രഖ്യാപിച്ചിരിക്കുകയാണ്. പല കല്യാണങ്ങളും മാറ്റിവെച്ചുകഴിഞ്ഞു. ജനം പെരുവഴിയില്‍ അലയുമ്പോഴാണ് ഉള്ള സഹകരണബാങ്കുകള്‍ കൂടി പൂട്ടിക്കാന്‍ ബി.ജെ.പിക്കാര്‍ ഇറങ്ങിയിരിക്കുന്നത്. സഹകരണബാങ്കില്‍ കള്ളപ്പണം ആരെങ്കിലും ഡെപ്പോസിറ്റ് ചെയ്തിട്ടുണ്ടെങ്കില്‍ രണ്ടാഴ്ച കഴിഞ്ഞാലും അതവിടെ തന്നെ കാണും. ഇപ്പോള്‍ തന്നെ അത് പൂട്ടിക്കണോയെന്നും അദ്ദേഹം ചോദിച്ചു.
സാഹചര്യം മറികടക്കാന്‍ കേന്ദ്രസര്‍ക്കാരിന് തോമസ് ഐസക് നാല് മാര്‍ഗങ്ങളും ഉപദേശിച്ചു. പ്രധാനമന്ത്രി നാടുചുറ്റല്‍ അവസാനിപ്പിച്ച്  ഇന്ത്യയില്‍ തിരിച്ചെത്തണം.  30-ാം തിയതി വരെയെങ്കിലും റദ്ദാക്കിയ നോട്ടുകള്‍ കടക്കാര്‍ക്കും മറ്റും സ്വീകരിച്ച് കൂലിയായും മറ്റും കൊടുക്കാമെന്നും പ്രഖ്യാപിക്കണം. അപ്പോഴേക്കും പഴയനോട്ടുകള്‍ക്ക് പകരം പുതിയ നോട്ടുകള്‍ കുറ്റമറ്റ രീതിയില്‍ എത്തിക്കാം. അതോടെ പഴയ നോട്ടുകള്‍ പൂര്‍ണമായി റദ്ദാക്കാം. സ്വര്‍ണക്കടക്കാരും ആഡംബര വസ്തുക്കളുടെ വില്‍പ്പനക്കാരും ഒരു കല്ഖത്തിന് മേല്‍ ഇടപാട് നടത്തുന്ന എല്ലാവരുടെയും കെ.വൈ.സി വിവരങ്ങള്‍ സൂക്ഷിക്കണമെന്ന് ഉത്തരവിറക്കണം. ആരെങ്കിലും കള്ളപ്പണം വെളുപ്പിക്കാന്‍ പോയാല്‍ പിന്നീട് പിടിക്കാന്‍ പ്രയാസമുണ്ടാകില്ല. ഇതനുവദിച്ചാല്‍ കള്ളപ്പണക്കാര്‍ ചെറു തുകകളായി സാധനങ്ങള്‍ വാങ്ങിച്ച് കള്ളപ്പണം വെളുപ്പിക്കുമെന്നാണ് പലരുടേയും പേടി.
അതിപ്പോഴും തടസ്സസമില്ലാതെ നടക്കുന്നുണ്ട്. കള്ളപ്പണം ഒരുലക്ഷം രൂപാവച്ച് ബാങ്ക് അക്കൗണ്ടില്‍ അടച്ച് കമ്മിഷന്‍ അടിസ്ഥാനത്തില്‍ വെളുപ്പിച്ചു തരാന്‍ നിരവധിപേരുണ്ടാവും. ഇതല്ലേ ഇപ്പോഴും നടക്കുന്നത്. അദ്ദേഹം ചോദിച്ചു. സംസ്ഥാന ട്രഷറി, സംസ്ഥാന ധനകാര്യ സ്ഥാപനങ്ങള്‍, പബ്ലിക് യൂട്ടിലിറ്റികള്‍ ഇവയെ സാധാരണഗതിയില്‍ പ്രവര്‍ത്തിക്കാന്‍ അനുവദിക്കണം. ഇവയുടെ മേലുള്ള എല്ലാ നിയന്ത്രണങ്ങളും നീക്കം ചെയ്യണം എന്നിവയാണ് തോമസ് ഐസക്കിന്റെ ഉപദേശങ്ങള്‍.