കൊല്ലം: ഓട്ടോറിക്ഷയില്‍ കറങ്ങിനടന്ന് കഞ്ചാവ് കച്ചവടം നടത്തിവന്നയാളെ പാരിപ്പള്ളി ജങ്ഷനില്‍ നിന്ന് എക്‌സൈസ് സംഘം പിടികൂടി. വര്‍ക്കല സ്വദേശിയും ഇപ്പോള്‍ കൊല്ലം പാരിപ്പള്ളി കടമ്പാട്ടുകോണത്ത് എന്‍എച്ച് പുറമ്പോക്കില്‍ റോഡുവിള വീട്ടില്‍ താമസിക്കുന്ന മണികണ്ഠന്‍ (53) ആണ് അറസ്റ്റിലായത്. ഇയാളില്‍ നിന്ന് 70 പൊതി കഞ്ചാവും പിടിച്ചെടുത്തു.
ഓട്ടോ ടാക്‌സിയുടെ മറവില്‍ കഞ്ചാവ് ചെറുപൊതികളിലാക്കി പാരിപ്പള്ളി, കല്ലുവാതുക്കല്‍ പ്രദേശങ്ങളിലാണ് ഇയാള്‍ വില്‍പ്പന നടത്തുന്നത്. വളരെ വര്‍ഷങ്ങളായി പിടിക്കപ്പെടാതെ കഞ്ചാവ് കച്ചവടം നടത്തിവരികയായിരുന്നു. ഇയാളില്‍നിന്നും കഞ്ചാവ് വാങ്ങുന്നവരെപ്പറ്റി എക്‌സൈസിന് സൂചന ലഭിച്ചിട്ടുണ്ട്. പ്രതിക്ക് കഞ്ചാവ് നല്‍കുന്നവരെപ്പറ്റി അന്വേഷണം നടത്തിവരികയാണെന്നും ഇതിന് ഷാഡോസംഘത്തെ നിയോഗിച്ചതായും എക്‌സൈസ് സി.ഐ വി .രാജേഷ് പറഞ്ഞു.
എക്‌സൈസ് ഇന്‍സ്‌പെക്ടര്‍മാരായ ജെ പി ആന്‍ഡ്രൂസ്, വിജയന്‍, അസി. എക്‌സൈസ് ഇന്‍സ്‌പെക്ടര്‍മാരായ ബാലചന്ദ്രകുമാര്‍, ഫ്രാന്‍സിസ് ബോസ്‌കോ, പ്രിവന്റീവ് ഓഫിസര്‍മാരായ നിഷാദ്, ഷിബു പാപ്പച്ചന്‍, സിവില്‍ എക്‌സൈസ് ഓഫിസര്‍മാരായ സുരേഷ് ബാബു, ബിജുമോന്‍, സതീഷ് ചന്ദ്രന്‍, രാജു, രഞ്ജിത്, ദിലീപ് എന്നിവരും സംഘത്തിലുണ്ടായിരുന്നു.