മാള: ഒരു ഗ്രാമത്തിന്റെ ഉള്‍ത്തുടിപ്പുകളുമായി പൂപ്പത്തി ഗ്രാമീണ വായനശാല ഒരുക്കിയ ചിത്ര പ്രദര്‍ശനം ശ്രദ്ധേയമായി.മാളക്കടുത്ത് പൂപ്പത്തിയിലെ മൂന്ന് ചിത്രകാരന്മാര്‍ ജീവന്‍ പകര്‍ന്ന ചിത്രങ്ങളാണ് പ്രദര്‍ശിപ്പിച്ചത്.കൃഷിയും, ഉത്സവങ്ങളും പെരുന്നാളുകളും ഗതാഗതവും കാളവണ്ടിയും വൃക്ഷങ്ങളില്‍ പടര്‍ന്ന് കയറിയ വെറ്റില ചെടിയും കന്ന് പൂട്ടലും തുടങ്ങി കാല്‍ നൂറ്റാണ്ട് മുന്‍പുവരെ കണ്ടു മറന്ന ദൃശ്യങ്ങള്‍ ഈ കലാകാരന്മാര്‍ പകര്‍ത്തിയിട്ടുണ്ട്. ചിത്രകലാകാരന്മാരായ ശ്രീകുമാര്‍, അനിയന്‍, ഉണ്ണി മേക്കാളി എന്നിവരാണ് ചിത്രങ്ങളൊരുക്കിയത്. ചിത്രകാരനായ മുന്‍ അധ്യാപകന്‍ ടി.സി നാരായണന്‍ ശില്‍പ്പശാല നയിച്ചു. വായനശാലയുടെ നേതൃത്വത്തില്‍ രൂപീകരിച്ച ബാലവേദിയുടെ ഉദ്ഘാടനം വി.ആര്‍.സുനില്‍കുമാര്‍ എം.എല്‍.എ നിര്‍വഹിച്ചു. ഉണ്ണി പിക്കാസോ ക്ലാസെടുത്തു.