കുട്ടനാട്ട്: അസാധുവായ ആയിരത്തിന്റെയും അഞ്ഞൂറിന്റെയും നോട്ടുകള്‍ മാറ്റി വാങ്ങാന്‍ സംസ്ഥാനത്ത് ഏറ്റവും കൂടുതല്‍ ബുദ്ധിമുട്ട് അനുഭവിക്കുന്നത് കുട്ടനാട്ടുകാരാണ്.
കുട്ടനാടിന്റ് ഉള്‍പ്രദേശങ്ങളിലുള്ളവര്‍ ഇപ്പോള്‍ മൂന്ന് ദിവസമായി ബാങ്കുകളില്‍ കയറിയിറങ്ങി നടന്നിട്ടും രക്ഷയില്ലെന്നാണ് പറയുന്നത്. കൈനകരി, ചെമ്പുംപുറം എന്നിവടങ്ങളിലുള്ളവര്‍ക്കാണ് കൂടുതല്‍ ബുദ്ധിമുട്ട്. പാണ്ടങ്കരി, എടത്വാ എന്നിവടങ്ങളിലെ ഉള്‍പ്രദേശങ്ങളിലുള്ളവരും വള്ളത്തിലും, ബോട്ടിലും ബാങ്കുകളിലെത്തി ക്യൂ നിന്നിട്ടും പണം കിട്ടാതെ മടങ്ങി. അവധി ദിവസങ്ങളില്‍ ബാങ്കുകള്‍ തുറന്നു പ്രവര്‍ത്തിച്ചെങ്കിലും കുട്ടനാട്ടുകാര്‍ വലഞ്ഞു. പഴയ നോട്ടുകള്‍ നല്‍കുമ്പോള്‍ ശനിയാഴ്ച വരെ നാലായിരം രൂപ നല്‍കിയപ്പോള്‍ ഇന്നലെ പണം ഇല്ലാത്തതുമൂലം ആയിരം രൂപ മാത്രമാണ് നല്‍കിയത്. പണം നിക്ഷേപിക്കാന്‍ വരുന്നവരുടെയും, ചെക്ക് നല്‍കി പണം പിന്‍വലിക്കാന്‍ വരുന്നവരുടെയും നീണ്ട ക്യൂവാണ് ബാങ്കുകള്‍ പൂട്ടുന്ന സമയം വരെ കാണാന്‍ കഴിഞ്ഞത്. കുട്ടനാട്ടിലെ ഒട്ടുമിക്ക എ.ടി.എം കൗണ്ടറുകളും പ്രവര്‍ത്തിക്കുന്നില്ല. കുട്ടനാട്ടിലെ ചെമ്പുംപുറം സ്വദേശികള്‍ക്ക് കിലോമീറ്ററുകള്‍ സഞ്ചരിക്കാതെ ബാങ്കിനെ ആശ്രയിക്കാന്‍ കഴിയാത്തതിനാല്‍ ഇവിടുത്തെ ജനജീവിതം ഏറെദുരിതത്തിലായി. ചമ്പക്കുളത്തോ, കളര്‍കോഡോ എത്തിയാലെ ഇവിടെയുള്ളവര്‍ക്ക് ബാങ്കിലെത്താന്‍ കഴിയൂ. ഗതാഗത പ്രശ്‌നം മൂലം വിയര്‍പ്പുമുട്ടുന്ന കുട്ടനാട്ടിലെ ഒട്ടുമിക്ക ഉള്‍പ്രദേശങ്ങളിലെയും സ്ഥിതി ഇതാണ്. പണമിടപാടുകള്‍ സങ്കീര്‍ണമായത് കുട്ടനാട്ടിലെ ഹൗസ് ബോട്ട് ടൂറിസത്തെയും ബാധിച്ചു. ഈ മേഖലയുമായി ബന്ധപ്പെട്ട് ആയിരങ്ങളാണ് കുട്ടനാട്ടിലുള്ളത്, പണത്തിന്റ് ക്ഷാമം കുട്ടനാട്ടിലെ നെല്‍കര്‍ഷകരെയും വലച്ചിരിക്കുകയാണ്. കുടിശിക പണം ഇനി ഈ മാസം ഇരുപത് കഴിഞ്ഞ് കിട്ടിയാല്‍ കിട്ടി എന്ന് പറയാമെന്നാണ് കര്‍ഷകര്‍ പറയുന്നത്. കൃഷിയേയും സാമ്പത്തിക പ്രതിസന്ധി ബാധിച്ചേക്കാം.