രാമപുരം: എല്ലാ വീടുകളിലും അടുക്കളതോട്ടം, കര്‍ഷകരെ കൃഷിയിലേക്ക് ആകര്‍ഷിക്കുക, യുവാക്കളെ പ്രോത്സാഹിപ്പിക്കുക ഇതിലൂടെ നമ്മുടെ ഭക്ഷ്യസമ്പത്ത് തിരിച്ച് കൊണ്ടുവരിക എന്നിവ ലക്ഷ്യമിട്ട് കൂടപ്പുലത്ത് എന്റെ മണ്ണ് നമ്മുടെ ആരോഗ്യം ജൈവ പച്ചക്കറി സമഗ്ര പദ്ധതി കര്‍ഷക പഠന ക്ലാസ് നടത്തി.
മികവ് കര്‍ഷക സ്വാശ്രയ സംഘത്തിന്റെയും, ഗവ. എല്‍.പി സ്‌കൂള്‍ പി.ടി.എയുടെയും സംയുക്ത ആഭിമുഖ്യത്തിലാണ് ക്ലാസ് സംഘടിപ്പിച്ചത്. ജൈവ പച്ചക്കറി കൃഷിയുടെ പ്രാധാന്യവും, കൃഷി രീതിയും സംബന്ധിച്ചുള്ള വിശദമായ ക്ലാസ്സുകളാണ് നടന്നത്. സ്‌കൂള്‍ ഹാളില്‍ നടന്ന യോഗത്തില്‍ സാബു മതിലിനകത്ത് അധ്യക്ഷത വഹിച്ചു. കര്‍ഷക സംഘം ഏരിയ പ്രസിഡന്റ് പി.ജെ വര്‍ഗീസ് ഉദ്ഘാടനം ചെയ്തു. രാമപുരം കൃഷി ഓഫിസര്‍ ജോ ജോസഫ്, സി.കെ ഹരിഹരന്‍ എന്നിവര്‍ ക്ലാസ് എടുത്തു. കെ.എന്‍ റെജികുമാര്‍, വിജയകുമാര്‍ തുടങ്ങിയവര്‍ സംസാരിച്ചു.