തിരുവനന്തപുരം: നോട്ടുകള്‍ പിന്‍വലിച്ചതോടെ സംസ്ഥാനത്തുണ്ടായ പ്രതിസന്ധി പരിഹരിക്കാന്‍ യു.ഡി.എഫ് നേതാക്കള്‍ റിസര്‍വ് ബാങ്ക് റീജിയണല്‍ ഡയറക്ടറെ കണ്ട് ഏഴിന നിര്‍ദേശങ്ങള്‍ സമര്‍പ്പിച്ചു.
യു.ഡി.എഫിന്റെ അടിയന്തിര യോഗത്തിന് ശേഷം ഇന്നലെ ഉച്ചതിരിഞ്ഞാണ് മുന്നണി ചെയര്‍മാന്‍ രമേശ് ചെന്നിത്തല, ഉമ്മന്‍ചാണ്ടി, പി.കെ.കുഞ്ഞാലിക്കുട്ടി, സി.പി.ജോണ്‍, എം.എം.ഹസ്സന്‍ എന്നിവര്‍ റിസര്‍വ്വ് ബാങ്ക് റീജിയണല്‍ ഡയറക്ടര്‍ എസ്.എം.സി സ്വാമിയെ കണ്ടത്. അഞ്ഞൂറിന്റെ നോട്ടുകള്‍ കേരളത്തിലെ എല്ലാ ബാങ്കുകളിലും അടിയന്തിരമായി എത്തിക്കുക, 10, 20, 50, 100 എന്നീ തുകകള്‍ക്കുള്ള നോട്ടുകള്‍ എല്ലാ ബാങ്കു ശാഖകളിലും എ.ടിഎമ്മുകളിലും ലഭ്യമാക്കുക, 24 മണിക്കൂറും എ.ടി.എമ്മുകള്‍ പ്രവര്‍ത്തിക്കുന്നതിനുള്ള പണലഭ്യത ഉറപ്പാക്കുക, എല്ലാ സഹകരണ സ്ഥാപനങ്ങള്‍ക്കും പഴയ നോട്ടുകള്‍ മാറ്റി നല്‍കാനുള്ള അനുമതി നല്‍കുക, അസാധുവാക്കപ്പെട്ട നോട്ടുകള്‍ സ്വീകരിക്കാന്‍ പെട്രോള്‍ പമ്പുകള്‍ക്കും ആശുപത്രികള്‍ക്കും അനുമതി നല്‍കിയത് പോലെ ഹോട്ടലുകള്‍, റസ്‌റ്റോറന്റുകള്‍ എന്നിവയ്ക്കും അനുമതി നല്‍കുക തുടങ്ങിയ നിര്‍ദ്ദേശങ്ങളാണ് യു.ഡി.എഫ് മുന്നോട്ടു വച്ചത്.