തിരുവനന്തപുരം: സംസ്ഥാനത്തെ റേഷന്‍ മൊത്തവിതരണം സഹകരണസംഘങ്ങള്‍ വഴിയാക്കാന്‍ സര്‍ക്കാര്‍ നീക്കം. ഭക്ഷ്യസുരക്ഷാ പദ്ധതി നടപ്പാക്കുന്നതിന്റെ ഭാഗമായാണ് റേഷന്‍ മൊത്തവ്യാപാരികളെ ഈ മേഖലയില്‍ നിന്നൊഴിവാക്കാന്‍ തീരുമാനിച്ചത്.
സംസ്ഥാനത്ത് ഭക്ഷ്യസുരക്ഷാ നിയമം പൂര്‍ണ്ണതോതില്‍ നടപ്പാക്കുന്ന 2017 ഏപ്രില്‍ ഒന്നുമുതല്‍ റേഷന്‍ മൊത്തവ്യാപാരികളെ പൂര്‍ണ്ണമായി ഒഴിവാക്കി റേഷന്‍ വിതരണം സഹകരണ സംഘങ്ങളെ ഏല്‍പ്പിക്കാനുള്ള ചര്‍ച്ചകള്‍ പുരോഗമിക്കുകയാണെന്ന് ഭക്ഷ്യവകുപ്പുമന്ത്രിയുടെ ഓഫീസ് സുപ്രഭാതത്തോടു പറഞ്ഞു. മാര്‍ച്ച് 31 വരെ നിലവിലുള്ള സംവിധാനം തുടരും. എന്നാല്‍, ഈ മാസംമുതല്‍ തന്നെ അരിസംഭരിക്കാന്‍ സാധിക്കുന്ന സഹകരണ സംഘങ്ങളെക്കൂടി സഹകരിപ്പിക്കുന്നുണ്ട്.
കൂടാതെ സപ്ലൈകോയുടെ ഗോഡൗണുകളിലും അരിസംഭരിച്ച് വിതരണം നടത്തും. എഫ്.സി.ഐയില്‍ നിന്ന് അരിയെടുത്ത് ഗോഡൗണുകളില്‍ സൂക്ഷിക്കാനുള്ള സംവിധാനം നിലവില്‍ സഹകരണസംഘങ്ങള്‍ക്കില്ല.
സപ്ലൈകോയ്ക്ക് 10 ഗോഡൗണുകള്‍ മാത്രമേയുള്ളൂ. ഇത് അപര്യാപ്തമാണ്. എന്നാല്‍, വെയര്‍ ഹൗസിങ് കോര്‍പ്പറേഷന്റെ ഗോഡൗണുകള്‍ അരി സംഭരണത്തിന് നല്‍കാമെന്ന് സമ്മതിച്ചിട്ടുണ്ട്. കൂടാതെ എഫ്.സി.ഐയുടെ ഒഴിഞ്ഞുകിടക്കുന്ന സ്ഥലവും, ഗോഡൗണുകളും വാടയ്ക്ക് നല്‍കാമെന്നും സമ്മതിച്ചിട്ടുണ്ട്. ഈ സംവിധാനങ്ങള്‍ പൂര്‍ണ്ണതോതില്‍ ഉപയോഗിക്കാനാവുന്ന തരത്തില്‍ ഏപ്രില്‍ ഒന്നിനു മുന്‍പ് സജ്ജമാക്കും.
ഇത് സംഭരണ-വിതരണത്തിനായി സഹകരണസംഘങ്ങള്‍ക്കു നല്‍കും. റേഷന്‍ മൊത്തവിതരണം സഹകരണസംഘങ്ങള്‍ വഴിയാക്കണമെന്ന നിര്‍ദേശം മന്ത്രിസഭായോഗം നേരത്തേ പരിഗണിച്ചിരുന്നു. എന്നാല്‍, റേഷന്‍മൊത്തവ്യാപാരികളെ ഒറ്റയടിക്ക് ആ മേഖലയില്‍നിന്ന് ഒഴിവാക്കുന്നതിന്റെ പ്രായോഗിക ബുദ്ധിമുട്ട് കണക്കിലെടുത്താണ് തീരുമാനം വൈകിയത്. എന്നാല്‍, കേന്ദ്ര ഭക്ഷ്യനിയമ പ്രകാരം റേഷന്‍ മൊത്തവിതരണം സര്‍ക്കാര്‍ ഏറ്റെടുക്കണമെന്ന് നിഷ്‌കര്‍ഷിച്ചതോടെ സര്‍ക്കാര്‍ നിയന്ത്രിത ഏജന്‍സികളെ ഏല്‍പ്പിക്കുന്നതിനെ കുറിച്ച് ആലോചിക്കണമെന്ന് മുഖ്യമന്ത്രി ഭക്ഷ്യവകുപ്പിനോടാവശ്യപ്പെട്ടിരുന്നു.
ഇതിന്റെ അടിസ്ഥാനത്തിലാണ് സഹകരണസംഘങ്ങളെ റേഷന്‍ മൊത്തവിതരണത്തിന് ഉപയോഗിക്കാമെന്ന് ഭക്ഷ്യവകുപ്പ് നിര്‍ദേശിച്ചത്. സഹകരണസംഘങ്ങള്‍ ഈ മേഖലയില്‍ വരുന്നതോടെ നിലവിലുള്ള 315 റേഷന്‍മൊത്ത വ്യാപാരികള്‍ പുറത്താകും.
ഭക്ഷ്യസുരക്ഷാ നിയമപ്രകാരം മുന്‍ഗണനാപ്പട്ടികയിലുള്ളവര്‍ക്ക് ഇന്നലെ മുതലാണ് റേഷന്‍ നല്‍കേണ്ടിയിരുന്നത്. എന്നാല്‍, എഫ്.സി.ഐ ഗോഡൗണുകളില്‍ നിന്ന് റേഷന്‍മൊത്ത വ്യാപാരികള്‍ക്ക് അരി ലഭിച്ചിരുന്നില്ല. അതിനാല്‍ റേഷന്‍കടകളില്‍ അരി എത്തിക്കാനും കഴിയാതായതോടെ റേഷന്‍ മുടങ്ങി.
അതേസമയം, സംസ്ഥാനത്ത് എല്ലാ ചില ജില്ലകളില്‍ മാത്രമാണ് അരിവിതരണം മുടങ്ങിയതെന്ന് ഭക്ഷമന്ത്രിയുടെ ഓഫീസ് പറയുന്നു. എഫ്.സി.ഐ ഗോഡൗണുകള്‍ക്ക് ഇന്നലെ അവധിയായിരുന്നതിനാല്‍ റേഷന്‍ മൊത്തവ്യാപാരികള്‍ക്ക് ലോഡ് എടുക്കാനാകാത്തതാണ് ഇതിനു കാരണമെന്നും രണ്ടു ദിവസത്തിനുള്ളില്‍ എല്ലാ റേഷന്‍ കടകളിലും അരി എത്തുമെന്നും മന്ത്രിയുടെ ഓഫീസ് ഉറപ്പുപറയുന്നു.