കൊച്ചി :ടെലിവിഷനിലും പത്രത്താളുകളിലും മാത്രം കണ്‍നിറയെ കണ്ട തങ്ങളുടെ താരങ്ങള്‍ കണ്‍മുന്നിലെത്തിയപ്പോള്‍ അവര്‍ക്കു വിശ്വസിക്കാനായില്ല. ഒന്നു തൊടണം എന്തെങ്കിലുമൊക്കെ ചോദിക്കണം, പിന്നെ അതിനായി തിരക്കു കൂട്ടല്‍. എല്ലാം ഒരു സ്വപ്നം പോലെ.
കേരളത്തിന്റെ സ്വന്തം ടീമായ കേരളാ ബ്ലാസ്‌റ്റേഴ്‌സ് എഫ്.സി ടീം അംഗങ്ങളാണു കൊച്ചി പെരുമ്പടപ്പ് സേക്രട്ട്ഹാര്‍ട്ട് ബോയിസ് ഹോമിലെ അന്തേവാസികളായ തങ്ങളുടെ കുട്ടി ആരാധകരെ കാണാനെത്തിയത്. ശനിയാഴ്ച കൊച്ചിയില്‍ നടന്ന മത്സരത്തില്‍ ചെന്നൈയിന്‍ എഫ്.സിക്കെതിരെയുള്ള ഉജ്ജ്വല വിജയം സമ്മാനിച്ച സന്തോഷത്തിലാണു ടീം അംഗങ്ങളായ ഹോസു കൂരീയാസ് പ്രീടോ, സെട്രിക് ഹെന്‍ബര്‍ട്ട്, ഗ്രഹാം സ്റ്റോക്ക്, സന്ദേശ് ജിംഗന്‍, റിനോ ആന്റോ എന്നീ ടീം അംഗങ്ങള്‍ സേക്രട്ട്ഹാര്‍ട്ട് ബോയിസ് ഹോമില്‍ ഞായറാഴ്ച വൈകുന്നേരത്തോടെ എത്തിയത്. കേരളാ ബ്ലാസ്‌റ്റേഴ്‌സിന്റെ ടൈറ്റില്‍ സ്‌പോണ്‍സര്‍മാരായ മുത്തൂറ്റ് ഫിന്‍കോര്‍പ്പ് ഈ പരിപാടി സംഘടിപ്പിച്ചത്, ഗാര്‍ഡിയന്‍സ് ഓഫ് ഡ്രീംസ് എന്ന സാമൂഹിക സേവന സംഘടനയുമായി ചേര്‍ന്നാണ്. അനാഥാലയങ്ങളിലെ അന്തേവാസികളായ കുട്ടികളുടെ ക്ഷേമത്തിന് വേണ്ടി പ്രവര്‍ത്തിക്കുന്ന സംഘടനയാണ് ഗാര്‍ഡിയന്‍സ് ഓഫ് ഡ്രീംസ്.
1935 സ്ഥാപിച്ച സേക്രട്ട്ഹാര്‍ട്ട് ബോയിസ് ഹോമില്‍ 10നും 18നും മദ്ധ്യേ പ്രായമുള്ള 30 ആണ്‍കുട്ടികളാണുള്ളത്. തങ്ങളുടെ ഇഷ്ടതാരങ്ങള്‍ എത്തുന്നതറിഞ്ഞ് അവരെ കാണാനായി സമീപത്തുള്ള ഡോണ്‍ ബോസ്‌കോ ബിഗ്‌ബോയ്‌സ് ഹോമിലെയും സെന്റ് ഫ്രാന്‍സിസ് ബോയ്‌സ് ഹോമിലെയും അന്തേവാസികളായ കുട്ടികളും എത്തിയിരുന്നു.
കുട്ടി ആരാധകരോട് കുശലം പറഞ്ഞും കളിച്ച് ചിരിച്ചും അവരുടെ കുസൃതി നിറഞ്ഞ ചോദ്യങ്ങള്‍ക്ക് മറുപടി പറഞ്ഞും ഏറെ നേരം ചെലവഴിച്ച ശേഷമാണ് കേരളാ ബ്ലാസ്‌റ്റേഴ്‌സ് ടീം താരങ്ങള്‍ മടങ്ങിയത്. മുത്തൂറ്റ് പാപ്പച്ചന്‍ ഗ്രൂപ്പ് ഡയറക്ടര്‍ തോമസ് ജോര്‍ജ്ജ് മുത്തൂറ്റ്, എക്‌സിക്യുട്ടീവ് ഡയറക്ടര്‍ തോമസ് മുത്തൂറ്റ് എന്നിവരും ടീം അംഗങ്ങളോടൊപ്പം എത്തിയിരുന്നു.