ഏറ്റുമാനൂര്‍: അടിച്ചിറ കവലയില്‍ നിയന്ത്രണം വിട്ട മിനിലോറി കെ.എസ്.ഇ.ബി യുടെ ട്രാന്‍സ്‌ഫോര്‍മറിനിടയിലൂടെ കയറി വഴിയരികിലെ കെട്ടിടം ഇടിച്ചു തകര്‍ത്തു. കോഴിക്കോട്ടു നിന്നും ചങ്ങനാശ്ശേരി പായിപ്പാട് മാര്‍ക്കറ്റിലേക്ക് മത്സ്യവുമായി പോകുകയായിരുന്ന ലോറി ഇന്നലെ വെളുപ്പിനെ 3 മണിയോടെയാണ് അപകടത്തില്‍ പെട്ടത്. ഡ്രൈവറും സഹായിയും അത്ഭുതകരമായി രക്ഷപ്പെട്ടു.
അടിച്ചിറ വളവ് തിരിയവെ റോഡിന്റെ വലതുവശത്തേക്ക് പാഞ്ഞുകയറിയ മിനിലോറി നൂലിഴ വ്യത്യാസത്തില്‍ ട്രാന്‍സ്‌ഫോര്‍മറില്‍ ഇടിക്കാതെ രക്ഷപ്പെടുകയായിരുന്നു. കെ.എസ്.ടി.പി യുടെ നിര്‍മാണത്തിലിരിക്കുന്ന സ്ലാബില്ലാത്ത ഓടയും കടന്ന് കെട്ടിടത്തിന്റെ മൂലഭാഗവും ഇടിച്ചുതകര്‍ത്താണ് ലോറി നിന്നത്.