കണ്ണൂര്‍: കണ്ണൂര്‍ ജില്ല ഫോട്ടോഫിനിഷിലേക്ക്. വോട്ടെണ്ണല്‍ പുരോഗമിക്കുമ്പോള്‍ ആകെയുള്ള 11 മണ്ഡലങ്ങല്‍ ഒന്‍പതിടത്തും എല്‍.ഡി.എഫാണു ലീഡ് ചെയ്യുന്നത്. സിറ്റിങ് മണ്ഡലങ്ങളായ ഇരിക്കൂറിലും പേരാവൂരിലും മാത്രമാണു യു.ഡി.എഫിനു ലീഡുള്ളത്. ഇരിക്കൂറില്‍ മാത്രമാണു യു.ഡി.എഫിനു വ്യക്തമായ ആധിപത്യമുള്ളത്. പേരാവൂരില്‍ യു.ഡി.എഫിനു നേരിയ ഭൂരിപക്ഷം മാത്രമാണുള്ളത്. സി.പി.എം പൊളിറ്റ് ബ്യൂറോ അംഗം പിണറായി വിജയന്‍ മത്സരിക്കുന്ന ധര്‍മടത്ത് അദ്ദേഹത്തിന്റെ ഭൂരിപക്ഷം 20000ത്തിലേക്കു കടക്കുകയാണ്. സി.പി.എം കേന്ദ്രകമ്മിറ്റിയംഗം ഇ.പി ജയരാജനു മട്ടന്നൂരിലെ ആധിപത്യം നാല്‍പതിനായിരത്തിലേക്കും തലശ്ശേരിയില്‍ സി.പി.എമ്മിലെ എ.എന്‍ ഷംസീറിന്റെ ലീഡ് 30000ലേക്കും കടക്കുകയാണ്. യു.ഡി.എഫിന്റെ സിറ്റിങ് മണ്ഡലങ്ങളായ അഴീക്കോടും കണ്ണൂരും ശക്തമായ മത്സരത്തിലൂടെ എല്‍.ഡി.എഫ് മുന്നിലെത്തി. മന്ത്രി കെ.പി മോഹനന്‍ കൂത്തുപറമ്പില്‍ 13000ത്തോളം വോട്ടുകള്‍ക്കു പിന്നിലാണ്. പയ്യന്നൂര്‍, കല്യാശ്ശേരി, തളിപ്പറമ്പ് മണ്ഡലങ്ങളാണു എല്‍.ഡി.എഫ് വിജയത്തിലേക്കു കടക്കുന്ന മറ്റു മണ്ഡലങ്ങള്‍.