മലപ്പുറം: തദ്ദേശ  സ്വയംഭരണ സ്ഥാപനങ്ങളുടെ നേതൃത്വത്തില്‍ ജനകീയ പങ്കാളിത്തത്തോടെ ജില്ലാ ഭരണകൂടം നടപ്പാക്കുന്ന കിണര്‍ റീചാര്‍ജിങ് പദ്ധതിയുടെ ജില്ലാതല ഉദ്ഘാടനം ഇന്നു രാവിലെ 10ന് കോഡൂര്‍ ഗ്രാമപഞ്ചായത്തില്‍ പി. ഉബൈദുള്ള എം.എല്‍.എ നിര്‍വഹിക്കും. ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ അധ്യക്ഷനാകും. ജില്ലാ കലക്ടര്‍ എ. ഷൈനാമോള്‍ വിഷയാവതരണം നടത്തും.
മഴ ഗണ്യമായി കുറഞ്ഞ ഈ വര്‍ഷം വരള്‍ച്ചയുടെ കാഠിന്യം മുന്‍കൂട്ടിക്കണ്ടു കിട്ടുന്ന ഓരോ മഴത്തുള്ളിയും കരുതലോടെ സംഭരിക്കുന്നതിനു ജില്ലാ കലക്ടറുടെ നേതൃത്വത്തില്‍ ജില്ലാ ഭരണകൂടം ആവിഷ്‌ക്കരിച്ച 'അടുത്ത മഴ എന്റെ കിണറിലേക്ക് ' പദ്ധതിക്ക് വന്‍ സ്വീകാര്യതയാണ് ലഭിച്ചുവരുന്നത്.
ജില്ലാതല ഉദ്ഘാടന ചടങ്ങില്‍ ജില്ലാ പഞ്ചായത്ത് വൈസ് പ്രസിഡന്റ് സക്കീന പുല്‍പ്പാടന്‍, ഗ്രാമപഞ്ചായത്ത് പ്രസിഡന്റ് സി.പി ഷാജി, മലപ്പുറം നഗരസഭാ ചെയര്‍പെഴ്‌സണ്‍ സി.എച്ച് ജമീല ടീച്ചര്‍, മലപ്പുറം ബ്ലോക്ക് പ്രസിഡന്റ് സെലീന, ഗ്രാമപഞ്ചായത്ത് അസോസിയേഷന്‍ ജില്ലാ പ്രസിഡന്റ് കെ.കെ നാസര്‍ പങ്കെടുക്കും. സോയില്‍ കണ്‍സര്‍വേഷന്‍ ഓഫിസര്‍ അജിത് സാങ്കേതിക ക്ലാസ് നയിക്കും.